Kinaluunniit ilinniagaqarsinnaavoq

Piumassuseqaraanni kinaagaanniluunnit aamma nunaqarfimmiuugaanniluunniit ilinniagaqartoqarsinnaavoq. Martin Sikemsen kapisilinni inunngorsimasoq ullumi Nuummi Ilisimatusarfimmi ilinniakkaminik aallaartitsivoq.
Assi © : Paarnaq Hansen/KNR
septembarip 01-at 2015 16:02

Ilisimatusarfik nunanut allanut naleqqiutissagaanni suli nutaajuvoq, tassami  1984-mi ilinniartoq siullerpaaq Ilisimatusarfimmi ilinnialeqqaarpoq. 

Ilisimatusarfik ukiunik 31-vinik pisoqaassuseqarpoq, Martin Sikemsenilu maanna Ilisimatusarfittulli utoqqaasuseqarluni ilinniakkani aallartippaa. Ilisimatusarfimmi ilinniarneqarsinnaasumi nutaami, Ehvervsøkonomimi ilinnialerpoq, ukiullu pingasut ilinniassalluni. 

Martin nunaqarfimmi Kapisilinni peroriartorsimavoq, angajoqqaavilu ilinniarsimasuunatik. 
Nuliaqarpoq Ane Sikemsenimik atilik marluullutillu pingasunik meeraqarlutik. Martinillu oqaatigaa meeqqaminut maligassiuilluarusukkami ilinniagarniarluni aalajangersimalluni.

-Ilaquttakka qitornakka takutissallugit ajornanngitsoq angunissaa, uannut sakkortusimagaluartoq toqqarsimavara ilinniagaqarnissara, Matin Sikemsen taama oqarpoq. 

Ilisimatusarfik 1989-mi universititetut taaneqarpoq, universititinngoramili sisamanik instituteqalersimalluni tassanilu ilinniarneqarsinnaasut assigiingitsut quliullutik. 

Aamma atuarukASSIT Ilisimatusarfimmi ilinniartut nutaat 180-it aallartipput

- Kisitsisaatiginngilagut kisianni oqaatigisinnaavara ilinniartut oqaluuttarnerisigut paasisarpara, ilinniartut amerlasuut ilisimatusarfimmi atualernertik alloriarujussuarnertut isigisaraat. Tassami amerlasuut angajoqqaavi ilinniarsimasuusanngillat. Taamaammat ilinniariartut pikkorilluinnartarput nutaanik misilitaqarusuttaramik, Jorunn Magnusdottir, taama oqarpoq. Ukiut ingerlanerini ilinniartut Martinitut ittut amerliartortut Ilisimatusarfimmi studiechef Jorunn Magnusdottir taama oqarpoq.

Martin Sikemsen ilinniarnini nuannarisimaqaa taamaammat nunaqarfimmioqatiminut ilinniaqqusilluni innersuussivoq.  

-Nuannersupilussuuvoq, innersuunnartupilussuuvoq allanut nunaqarfimmiunut. Ikikkamik ilinniarnertuunngorniarfinni naammassisartut, taamaammat innersuunnartupilussuuvoq ilinniarnissamut, Martin Sikemsen oqarpoq.

Martin Sikemsen ilinniakkani naamaassiguniuk namminersortut pisortalluunniit suliffeqarfiutaanni aningaasarsiornermik immikkut ilisimasalittut sulilersinnaavoq imaluunniit suliffeqarfiup ingerlanneqarnerani ineriartornissaanullu tamatigoortumik ilisimasalittut ilinniagaqassalluni.