Attaveqaatit atorlugit atuartitsineq misilerarneqarpoq

Aallaqqaammut Nanortallup atuarfiata Tasiusallu atuarfiata akornanni atuartitsinermi qarasaasiani atuineq kommunip misileraqqaassavaa. 

iPadit atorneqalerneranni atuarfiit atortorissaarusersorneqareersimapput. 

- Nunaqarfiit atuarfiini atuartitsineq qaffassarniarlugu Kommune Kujallermi atuarfeqarfiup kissaatigaa kommunimi atuarfinni minnerusuni attaveqaatit atorlugit atuartitsineq ingerlanneqalissasoq. Atuartitsissutini ilinniartitsisussaqarfiunngitsuni illoqarfimmi atuartitsinermut atuartut malinnaasarnissaat kissaatigineqarpoq, Kommune Kujalleq allappoq.

Aamma atuaruk Atuartut internetikkut tuluttoortalissapput

- Atuartut taamaalillutik kommunimi illoqarfiup atuarfiani atuartitsineq pitsaanerpaaq neqeroorutigineqarsinnaasoq malinnaaffigisinnaalissavaat. Suliniut aamma nuna tamakkerlugu malinnaaffigineqarluartpoq tassami Qarasaasianik atuinerulernissamut Naalakkersuisut 2014-17-imi periaasissaanni qarasaasiat atuartitsinermi atorneqarnerulernissaat siunertarineqarmat.

Atuarneq aallartinniariarpat ilinniartitsisut peqataasussat attaveqaatit atorlugit ilinniartitsinermi atortussat atornissaannut ilinniartinneqassapput tamatumalu kingorna misileraaneq aallartissalluni.

- Misileraaneq iluatsilluassappat kommunimi atuarfiit akornanni attaveqaatit atorlugit atuartitsineq ingerlanneqarsinnaanngussaaq, atuartitsinerlu taamaallaat illoqarfimmiit nunaqarfimmut sammisinneqartarnavianngilaq, aammali nunaqarfinni ilinniartitsisut illoqarfiit atuarfiini klassinut ilinniartitsisinnaassapput taamalu atuartut tamarmik kommunimi ilinniartitsisunit pikkorissunit pissarsiaqarluarsinnaalissallutik.

Misileraaneq Qarasaasialerinermut Aqutsisoqarfik suleqatigalugu ingerlanneqassaaq, atortorissaarullu atorneqartoq nunatsinni ilinniarfinni arlalinni attaveqaatit atorlugit atuartitsinermi atorneqartareerpoq.