Atuartut internetikkut tuluttoortalissapput

Tamanna ilinniartitaanermut naalakkersuisup, Nivi Olsenip, tusagassiuutinut katersortitsigami ippassaq oqaatigaa.

Neriuutigaalu interneti atorlugu nunaqarfinni atuarfinni avinngarusimasuni allamiut oqaasiinik alimasissumik atuartitsisarneq piviusunngorumaartoq.

Nunaqarfinni meeqqat atuarfiini internetsikkut alimasissumik atuartitsisoqartarereerpoq. Sisimiuni ilinniarnertuunngorniarfimmi GUX-imi tuluttoornermi tuluit nunaanneersumik aammalu qallunaatoornermi Danmarkimut attaveqarluni ilinniarneq atorneqartalersimasoq, iluatsilluartoq naalakkersuisup nuannaarutigalugu oqaatigaa. 

-Taamatut atuartitseriaaseq iluatsittorujussuuvoq, naak imaattaraluartugut internetikkut atuartitseriaaseq aqqutissaanngitsut misiliinerit siulliit iluatsippallaanngimmata, ilinniartitaanermut naalakkersuisoq, Nivi Olsen, taama oqarpoq.

Kapisilinnitut atuartitsineq siammarterniarpa

Nuup eqqaani Nunaqarfimmi Kapisilinni, meeqqat atuarfianni interneti atorlugu taama atuartitsisoqartareerpoq. Tamannalu iluatsittutullu oqaatigineqartoq, Nivi Olsenip oqaatiga, maannakkut taamatut meeqqat atuarfiini atuartitsineq nutaaliaasup siammarternissaanut nukini atorniarpai.

-Taanna aqqut inerisarniarpasipparput avinngarusimasunut nunaqarfinnut tunngatillugu, Nivi Olsen oqarpoq.

Ilinniartitsisut amerlasuut allamiut oqaasinik pikkorissut nunaqarfinni pigineqanngippata, taava nunaqarfinni meeqqat atuarfiini tuluit nunaanneersumik ataatsimik, interneti atorlugu alimasissumik atuartitsineq imminut akilersinnaassasoq, Nivi Olsenip tusagassiuutinut katersortitsinermini oqaatigalugu.

Nunaqarfinulli internetikkut attaveqaatit pitsaanerpaanngillat.

Tamannalu Nivi Olsenip ajornartorsiut sulissutiginerarpaa.