Nunaqarfiit arlallit matoriaannaapput
Kalaallit Nunaat annertuumik unammilligassaqarpoq. Innuttaasut najugaqariaasiat pillugu nalunaarusiami erserpoq nunaqarfiit arlallit matunissamut ulorianartorsiortut. Ukiut qulit 20-illu akornanni taama pisoqariaannaasoq oqaatigineqarpoq. Taama nalunaaruteqarpoq Naalakkersuisut siulittaasuat Kuupik Kleist Inatsisartut ukiaanerani katersornerat tallimanngorneq septemberip 16-at ammarmat.
Kisitsisit taama takussutissiinerat Pilersuisumit qanittumi uppernarsarneqarpoq. Nunaqarfimmiut ukiumut 5 procentimik ikileriartarput taamalu ingerlasoqaannassappat Pilersuisup pisiniarfiini ammasarfiit sivikillisinnaapput aammalu nioqqutissat ikilineqarsinnaallutik.
- Nioqqutissat akii nioqqutissaqarnerlu pissutaaqataasarput nunarfimmiut nuuttarnerannut.Ilaat nunaqarfinnut inuussutissarsiornikkut periarfissagissaarnerusunut nuuttarput ilaat illoqarfinnut nutsertut, Qaasuitsup Kommuniani kommunabestyrelsemi Kullorsuarmiit ilaasortaq Themothæus Petersen KNRimut oqarpoq.
Taanna aamma nunaqarfiit peqatigiiffiannit KANUNUPE-mi siulersuisuni ilaasortaavoq. Taanna isumaqarput ineriartorneq ilorraap tungaanut saatinniarlugu nunaqarfimmiut namminneq aamma iliuuseqarsinnaasut.
- Tunisassiorfiliortoqarsinnaavoq kalaaliminernik tunisassiortunik. Taamatut aallartilluartuni takussutissaavoq KNT A/S Niaqornani tunisassiorluni aallartereersoq. Neriuppugut taakku aamma Kullorsuarmi aallartissinnaajumaartut, Themothæus Petersen oqarpoq.
Taanna oqarpoq Kullorsuarmi ilorraap tungaanut ineriartortoqartoq aalisarnermut tunisassiornermullu periarfissat pitsanngormata. Isertorsinnaanngilaali nunaqarfiit allat ikiorneqarnissamik pisariaqartitsimmata.
- Naalakkersuisooqatigiinnissamik isumaqatigiissummi allaqqavoq kalaaliminernik tunisassiornissaq pingaaruteqartoq. Anguniakkap taassuma piviusunngornissaa maanna utaqqiinnarparput, Themothæus Petersen oqarpoq.
Naalakkersuisut siulittaasuat Kuupik Kleist ammaalluni oqallinnermi oqarpoq nunap immikkoortuini ineriartornissamut pilersaarut isumalluarfigineqartoq, tamannalu aamma Themothæus Petersenip isumaqatigaa. Taamaattoq isumaqarpoq pissutsit ajorsiartornerannut Naalakkersuisut akisussaaqataasut.
- Naalakkersuisut annernartunik aalajangertarsimapput soorlu sanaartugassat sipaarniarfigalugit. Nunaqarfinni inissaaleqineq aamma atuuppoq inissaqannginnerlu pissutigalugu nunaqarfinnut allanut illoqarfinnullu nuuttoqartarpoq, Themothæus Petersen oqarpoq.
Naalakkersuisut siulittaasuata ammaalluni oqalugiaataa aqagu marlunngornermi Inatsisartut oqaluuserissavaat. Naalakkersuisooqatigiinnissamut isumaqatigiissut aasinnaavat linki ataaniittoq toorlugu.
