Nunap inoqqaavi ajorsartitaavissunngillat

Nunat amerlanerussuteqartut nunap inoqqaavisa pisinnaatitaaffii pillugit FN-ip nalunaarusiaa ippassaq itigartippaat.

Naak FN-imi taasisitsineq nikalluallaataagaluartoq, nunap inoqqaavi ajorsartitaavissunngillat. Taama oqarpoq nunanut allanut ministereqarfimmi qaffasissumik atorfilik, Tyge Lehmann.

Tyge Lehmann nunap inoqqaavisa pisinnaatitaaffii pillugit nalunaarusiap isumaqatigiinniutigineqarnerani ippassarlu taasissutigineqarnerani peqataavoq. Taasisitsinerup kinguneraa nalunaarusiaq maanna kinguartinneqarmat, FN-illu ataatsimeersuaqqinnissaa – aappaagu septembarip aallaqqaataani pisussaq – sioqqullugu taasissutigineqaqqittussanngorluni.

Nalunaarusiassaq ukiut 20-t sinnerlugit suliarineqarpoq. Tyge Lehmannip paasisinnaalluarnerarpaa taasisitsineq nunap inoqqaavisa akornanni puffaammiutigineqarlunilu pakatsissutigineqarmat. Taamaattorli Lehmann eqqissisimanissamik kajumissaarivoq, taassumami nunat nalunaarusiamut akerliusut oqaloqatigineqarsinnaassasut neriuutigaa.

- Soorunami taasineq pakatsinarpoq aarleritsannarlunilu. Taamaattorli qaammatini tulliuttuni nalornisut qularunnaarsinniartussaavavut, nalunaarusiaq allakkiaammat kinguneqarluartussaq, ersigisariaqanngitsorlu, Tyge Lehmann tikkuaavoq.

Lehmann isumaqarpoq taasisitsinerup inerneranut pisuusut tassaasut nunat Afrikamiittut, taasisitsineq sioqqutitsiarlugu tunuartilersut. Nunat soorlu Namibiap aamma Igitsinip nalunaarusiap nunamut pisuussutaanullu pisinnaatitaanermut tunngasortaasa eqqarsaatigilluarnissaat piffissaqarfigerusuppaat. Nunat Afrikamiittut New Zealandimit, Australiamit Canadamillu tapersersorneqarput.

Nalunaarusiassap suliareqqinneqarnerani paasinarsissaaq akerliusut nalunaarusiap oqaasertaanik annertuumik allannguiniassanersut, soorlu naalagaaffiit soqutigisaasa ersarinnerulernissaat piumasaralugu, taamaalilluni nunap inoqqaavisa pisinnaatitaaffii massakkut siunnersuutigineqartumit sakkukillisillugit.

Taamalu pisoqassappat Tyge Lehmannip ilimagaa nunap inoqqaavi naammagittaalliulissasut.

Taava “allatut inissisimalissaagut”, nunanut allanut ministeriaqarfimmi atorfilik Tyge Lehmann oqarpoq.

Karasjokimi Saamit Inatsisartuini siulittaasup, Aili Keskitalo-p aammattaaq FN-imi taasineq pakatsissutigaa.

- Ukiut 24-t isumaqatigiinniareerluni, angusassaq angulivikkaluarlugulu, ajorsarluni narrutsannarpoq. Annilaanngatigaara FN-imi taasineq inuit pisinnaatitaaffiinut siunnersuisoqatigiinnut pilersinneqaqqammersunut sakkukinnerulersitsissasoq. Taasinerup inernera nunarsuatsinni nunap inoqqaavinut tamanut nuanniitsuuvoq, Saamit Inatsisartuini siulittaasoq oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat