Inuusuttut 28-t Issittumi tunngaviusumik ilinniarneq naammassigaat
Inuusuttut 28-t Issittumi tunngaviusumik ilinniarneq pingasunngormat naammassigamikku nuannattunnguaqarpoq.
Issittumi tunngaviusumik ilinniarfimmi ilinniartut ukiup affaani sukataataareerlutik ilinniarnertik naammassillugu pingasunngormat persuarsiorput.
Julia Steenholdt taakkununnga ilaavoq, taanna tulluusimaarpoq timikkulli aamma qasulluni:
- Kiisami nuannersorujussuuvoq. Qaammatit arfinillit sukkarsuaarput arriillutillu, taanna oqarpoq.
Ilinniarneq ilinniarnernut allanut ammassisoq
Issittumi tunngaviusumik qaammatini arfinilinni ilinniarnermi ikiueqqaarneq, sakkutuutut piginnaasat, imarsiornerlu ilaatigut ilinniarneqartarput.
Issittumi tunngaviusumik ilinniarnermik naammassisut illersornissaqarfimmi ilinniakkanut allanut ilinniaqqinnissamut tunngavissinneqarluartarput, sakkutuut imarsiortut, sakkutuut timmisartortartut, sakkutuutut nalinginnaasutut illersornissaqarfiulluunniit immikkoortuinut allanut ingerlaqqissinnaallutik.
Pisortalluunniit suliffeqarfiini, pissuserissaarnissamik, suleqatigiissinnaassusermik qanoq iliorsinnaassuseqarnissamillu piumasaqaateqarfiusuni ilinniaqqissinnaalissallutik.
- Naammassigatta illersornissaqarfiup iluani ilinniakkanut ammaassisuuvoq sumulluunniit qinnuteqarsinnaavugut ilinniarfissat assigiinngitsorpassuupput, Julia Steenholdt oqarpoq.
Taassuma qatserisartutut ilinniareeruni sakkutuutut imarsiortuuneq tullinnguukkusuppaa.
Ilinniartut 28-t naammassipput, 27-llu uniformitik atuinnarallassavaat. Ataasinngorpammi sapaatip akunnerini sisamanik sivisussuseqartussami qatserisartunngorniarneq Nuummi aallartissavaat.
Eqqissisimaaqqaalaassappulli.
Sakkutuunngorniat allagartartaarnissartik ullormik sioqqullugu sermersuup tungaanut 10 kiilumik nammatalerlutik 37 kilometerit missannik isorartutigisumik pisupput. Ilinniarnertillu Julia Steenholdtip ima oqaluttuaritsiarpaa.
- Ullaat tamaasa torersaasarpugut arfinernut. Torersaareeraangatta ullaakorsiortarpugut taava stueftersynertittarpugut tassanngaanniit ulloq aallartittarpoq arfineq pingasut missaani. Skytdageqarutta nunami sungiusarsinnaavugut aamma skydebanedageqartarnikuuvugut. ulloq naallugu skydebanitsinniilluta immaqaluunniit ullut ilai klassimiittarpugut kisiani nunamiinnigut amerlanerupput, Julia Steenholdt oqarpoq..
Misigisarpassuilli saniatigut naammassiniagassarpassuaqarpoq aamma.
- Nammineq killissatsinnik qaangiisarpugut. Killigisakkanik qaangiineruvoq, ulorianalaarpoq, naammassigaangattalu iluartaqaaq, taanna oqarpoq.
Inuusuttut nunatsinneersut
Julia Steenholdtip ilinniarnertuunngoreerami Issittumi tunngaviusumik ilinniarneq aallartippaa, siunissarlu eqqarsaatigalugu suli nalorninartoqarsinnaavoq, amerlasuummi ilinniarneq taanna alloriaqqiffissatut atortarpaat:
- Amerlasuut nunaqarfinninngaanneerput. Imaassinnaasoq nunaqarfianni qatserisartoqanngitsorluunniit. Taava siunissami ima atorsinnaagamikku angerlarunik novembari naappat qatserisartutut. Siunissami atorneqarsinnaavoq nammineq nunaqarfigisami illoqarfigisami qatserisartooqataalerluni ilinniagaqarluni, Julia Steenholdt oqarpoq.
Naallu inuusuttut nunatsinni sumiiffinnit assigiinngitsuneersuugaluarlutik ataatsimoornermik misigissuseqarput.
Ataqatigiissinnaaneq Julia Steenholdtip Issittumi tunngaviusumik ilinniarnermi pingaarnerpaatut ilikkarsimasamisut taavaa. Ilinniartut tamarmik immikkut pikkoriffeqarlutillu nukittuffeqarput, sanngiiffeqarlutillu. Suleqatigiissinnaassuserlu ikiuisinnaassuseqarnissarlu taassuma pingaartippai.
Naallu Issittumi tunngaviusumik ilinniarnermi maannamut aappassaa aatsaat naammassisoqaraluartoq, ilinniarneq taanna nunatsinni upalungaarsimanerup ineriartortinnissaanut pingaaruteqarpoq. Julia Steenholdtillu qularinngilaa ilinniarnini sumut atussanerlugu:
- Pingaartippara ikiuulluarnissara, aamma neriuppunga siunissami ikiuussinnaallunga arlaatigut, Julia Steenholdt oqarpoq.
