Tuttunniarneq ullumi unissasoq
Sunngiffimmi tuttunniarneq piniarfinni Sisimiut-Kangerlussuarmi, Akia-Maniitsoq Ameralimmilu ullumi oktobarip ulluisa 31-anni unissaaq. Aalisarnermut, piniarnermut, nunalerinermut imminullu pilersornermut naalakkersuisoqarfik tusagassiorfinnut taama nalunaaruteqarpoq.
Tassa imaappoq, sunngiffimmi pinialuttartut tuttunniarsinnaanerat ullumi tallimanngornermi kingullermik piniarsinnaassapput.
Inuussutissarsiutigalugu sunngiffimmilu pinialuttartut tuttunniarsinnaanissamut akuersissummik aappaagu 2026-mi qinnuteqarsinnaassappata pisanik nalunaaruteqarsimanissaat inatsisitigut piumasaqaataalernikuusoq naalakkersuisoqarfiup nalunaarutigaa.
- Tamanna isumaqarpoq inuussutissarsiutigalugu piniartut aamma sunngiffimmi pinialuttartut 2025-mi pisanik nalunaaruteqarsimasut kisimik 2026-mi akuersissutinik qinnuteqarsinnaassasut. Taamaammat tuttunik umimmannillu pisanik nalunaaruteqarnissaq pingaaruteqartorujussuuvoq, naalakkersuisoqarfik allappoq.
Tuttunik umimmannillu pisanik nalunaaruteqarneq nittartakkakkut www.sullissivik.gl aqqutigalugu pisinnaavoq imaluunniit akuersissummik pisanik nalunaaruteqarnertalimmik kommunimut utertitsinikkut.
- Pisaqarsimanngikkaanni susaarsimanertut nalunaarutigineqassaaq. Piffissaliussap piniarfiusup naareerneranit pisanik nalunaaruteqarnissamut ullut 14-it periarfissaapput.
