Nunaoilip pisortaa: Uuliamik aatsaat nassaartoqarpat sinneqartooruteqartalissaagut

Uuliasiortitseqatigiiffimmik Nunaoilimik piginnittut ippassaq ataatsimeersuarput. Nunaoilip pisortaa qaqagu sinneqartooruteqarsinnaassanerlutik oqaatigisinnaanngikkaluarlugu uuliamik nassaartoqarpat uuliasiortitseqatigiiffik sinneqartooruteqartalissangatippaa.
apriilip 23-at 2015 14:10

Uuliasiortitseqatigiiffik Namminersorlutik Oqartussanit tamakkiisumik pigineqartoq Nunaoil ippassaq ataatsimeersuaartitsivoq.

Naak siulersuisunngortuni marluinnaat ilaagaluartut Nunaoilip pisortaata Hans Kristian Olsenip, ataatsimeersuaarneq ingerlalluarnerarpaa.

- Tassa ajunngitsumik aammalu eqqissisimasumik ingerlanneqarpoq. Aammalu siulersuisut nutaat sassartinneqarlutik, Nunaoilip pisortaa Hans Kristian Olsen oqarpoq. 

Aamma atuaruk Stine Bosse Nunaoilimi siulersuisunngorpoq

Siulersuisuni siulittaasunngortoq tassaavoq inuussutissarsiornermut siuttutut misilittagaqarluartoq Stine Bosse. Taanna ilaatigut aamma TDC-imi, Banknordik-imi Danmarkillu isiginnaartitsisarfissuani, Det Kongelige Teaterimi, siulersuisuni ilaasortaavoq. 
Siulersuisunilu ilaasortanngorlaat allat pingasut tassaapput: Royal Arctic Linemi naatsorsuisuulerinermi pisortaq Louise Langholz, KNR-imi maanna pisortaq tunuartussaq Søren Lennert Mortensen, Seadrill Managementimi pisortaq Per Wulff. 

Taakkua saniatigut Nordsøfondenimi pisortaq Peter Helmer Steen Naalagaaffiup sinniisigisaa kisiartaalluni qinigaaqqippoq.

Ukiumoortumik nalunaarusiaq akuerineqartoq

Ataatsimeersuarnermi siulersuisunngortut marluinnaat ilaapput. Kisianni piginnittut sinnisaat, Nammilersorlutik Oqartussaneersut  najuupput. Tassalu Nunaoilip ukiumoortumik nalunaarusiaa akuerineqarpoq. 

Nunaoil 2014-imi 6,7 mio. koruuninik amingartooruteqarpoq, ilimagisamiit taakkua 2,2 mio. koruuninik pitsaanerupput. 

Angusarissaarnermut pissutaanerpaavoq missingiuutini ilaatinneqanngitsunik sajuppillatsitsinikuut paasissutissanik katersanik tunisinikkut isertitaqarneq aamnalu aningaasartuutitigut sipaaruteqarneq. 

Aamma atuaruk Nunatsinni uuliasiornissaq soqutigineqartuarsinnartoq

Uuliasiortitseqatigiiffilli qaqugu sinneqartooruteqassanersoq Hans Kristian Olsenip oqaatigerusuppallaanngilaa: 

- Aatsaat uuliamik imminut akilersinnaasumik qalluisoqalersitsillugu Nunaoili aningaasanik annertuunik ersititsisinnaalissasoq, taannalu soorunami ullumikkut oqaatigisinnaanngilara qanoq piviusunngussanersoq. 

Uuliamik Nunatsinni nassaartoqassappat Hans Kristian Olsenip Nunaoil sinneqartooruteqartalissangatippaa: 

- Uagut ullumikkut oliemik imaluunniit ikummatissanik ujaarlerneq ingerlapparput, taamaattumillu aatsitassarsioqatigiiffittut aammalu uulisioqatigiiffittut assingusumik ingerlavugut. Nassaartoqarpat aatsaat  iluaqutigalugu aningaasarsiorsinnaalissalluta, Hans Kristian Olsen KNR-imut oqarpoq.