Stine Bosse Nunaoilimi siulersuisunngorpoq

Inuussutissarsiornermi siuttutut misilittagaqarluartoq Stine Bosse siulersuisuni siulittaasunngorpoq.

Siulittaasunngortoq ataatsimeersuarnermut najuutinngikkaluarluni aallartilluarnissaminut qilanaarluni KNR-imut oqaluttuarpoq.

- Siullertut suliffeqarfimmi sulisut, tassa pisortat allallu, ilikkarluarnissaannut qilanaarpunga. Taavalu suliffeqarfimmut unamminartut soorunami suunersut pulaffigilluarniassavakka, Stine Bosse oqarpoq.

Taanna ilaatigut aamma TDC-imi, Banknordik-imi Danmarkillu isiginnaartitsisarfissuani, Det Kongelige Teaterimi, siulersuisuni ilaasortaavoq.

Suliassaqarluarporlu:

- Uuliasiorneq maanna akiusut siunissamilu akiulerumaartut eqqarsaatigalugit ullumikkut qaammmatialui matuma siornanut sanilliukkaanni allaanerujussuusoq nalunngilara. Oqaluuserisassat naatsorsuutigisamiit allaanerusut amerlaqaat, tamakkualu soorunami paasisariaqarpavut. Tamakualu suliffeqarfimmi suliarissavagut.

Aamma atuaruk Namminersorlutik Oqartussat: NunaOilimi aningaasartuutit qaffasissorujussuit

Ilaasortanngortut akuleriilluartut

Siulersuisut tamajangammik, danskit naalagaaffiata sinniisaa kisimi pinnani, Namminersorlutik Oqartussallu isumaqatiigiinnginnertik pissutaalluni ukioq kingulleq oktobarimi tunuarput. taamali pisoqarsimanera Stine Bossimut anusinnguutaanngilaq.

-Taamannak pineq pissanganartorsiornaraluarpoq, kisianni tassa taamatut ilaanni pisoqariasaartarpoq. Isumaqatigiissinnaanngikkaannili aqqut ataasiinnaavoq, tassalu siulersuisut oqassasut, maanna ilaajunnaarpugut. Namminersorlutik Oqartussat piginneqatigiiffik pillugu suniarnerannik paasinnilluarsoraanga. Tamannalu piviusunngortinniarlugu tamaviaaqataassaanga, Stine Bosse oqarpoq. Tamannali aamma siulersuisoqatitaanilu oqaloqatigiissutigisassaraat.

- Soorunami. Pilersaarusiornermut oqallilluassaagut, matumanilu siulersuisuni ilaasortanngortut akuleriiaarluartuuneri nuannarutigaakka. Piginnaasaqarluartuupput, taakkuullutalu ulluni qaninnerni aammalu soorunami piffissami ungasinnerusumi susoqassanersoq oqaluuserissavarput, NunaOil A/S-imi siulersuisut siulitatasortaavat Stine Bosse oqarpoq.

Siulersuisuni ilaasortanngorlaat allat tassaapput Per Wulff, Louise Langholz, Søren Lennert Mortensen. Naalagaaffiup sinniisaa Peter Helmer Steen kisiartaalluni qiningaaqqippoq.

Aamma atuaruk Nunaoil qaammaterpassuarni susinnaajunnaarsinnaasoq