URANI Nunanit allamiut uranisiornermut akerliusut Inuit Ataqatigiinnit qaaqquneqartut
![](/sites/default/files/styles/image_934x467/public/article_images/sara-olsvig-uran_0.jpg?itok=V3PxUVTV)
Inuit Ataqatigiit urani pillugu Narsami juunip aqqarngani isumasioqatigiissitsilerpat uranimik akerliusut nunanit allaneersut arlallit peqataassapput.
Uranisiornerup avatangiisinut peqqissutsimullu sunniutissai nunanilu tamalaani pissutsit IA-p isumasioqatigiissitsinermini pingaarnertut sammitinniarpai.
Nunani allamiut nunatsinni oqallinnermut ilanngussaqassapput
Nunatsinneersunik, Canadameersunik Astraliameersunillu oqalugiartoqassaaq, taakkulu urani aatsitassanillu qinngornernik ulorianartortalinnik piiaaneq pillugu ilisimasaminnik isummaminnillu avitseqatigiissinneqassapput.
- Isumasioqatigiinnermi Inuit Ataqatigiit kissaatigaarput nunanit allanit misilittakkat Nunatsinni oqallinnermi sammineqarpiarneq-ajortut Nunatsinnut anngutissallugit. Pingaartissimavarput Canadamit Australiamiillu misilittakkat assersuutitut pitsaasutut oqaatigineqakkajuttut toqqaannarnerusumik tusarfigissallugit. Isumasioqatigiinnermit isummat assigiinngisitaarnerusut Nunatsinni oqallinnermut apuunnissaat kissaatigaarput, Inuit Ataqatigiit siulittaasuat Sara Olsvig taama oqarpoq.
Nunanit allaneersut tamsrmik akerliusuupput
Nunanit allanit peqataasussat suliniuteqartuullutillu ilisimatuujupput, assigiissutigisaalli tassaavoq tamarmik uranisiormik akerliusuunerat.
Nunatsinnit Savaatillit Peqatigiit Suleqatigiissut peqataassapput Narsamilu uranimut angertut naaggaartullu oqalugiartussatut aamma qaaqqusaasimapput.
Isumasioqatigiissitsineq tamanut ammavoq, qaaqqusallu aamma ilagaat aatsitassarsioqatigiiffik GME partiillu tamaasa.