Nunani muslimeqarfiusuni arlalinni Israelimut akerliussutsimik takutitsinerit imaaginnavittut
Nunani muslimeqarfiusuni arlalinni Israelimut akerliussutsimik takutitsinerit pingasunngornermi imaaginnavipput.
Nutaarsiassaqartitsivik AFP taama allappoq.
Gazami napparsimmaviit ilaata marlunngornermi qaartartumeerneqarnerata kingorna akerliussutsimik takutitsinerpassuit aallartipput.
Akerliussutsimik takutitsisut isumaqarput Israel qaartartumeerisuusoq, Israelilli pasilliutit tamakku ilumuunnginnerarpai.
Assersuutigalugu Libanonimi islamisiortut Hizbollahkkunneersut hunnorujulikkaat Libanonip kujasissuani akerliussutsimik takutitsipput.
Aamma Jordanimi, Libanonitut Israelimut aamma killeqarfeqartumi, akerliussutsimik pingasunngornermi takutitsisoqarpoq. Inuit 10.000-t missaanniittut Israelip Jordanimi aallartitaqarfiata silataani katersuussimapput, Israelimiut atorfilittaasa nunamit taassumannga anisitaanissaat piumasaralugu.
Libanonimi Jordanimilu akerliussutsimik takutitsisoqarnerata saniatigut Bahrainimi, De Forenede Arabiske Emiraterini, Egyptenimi, Iranimi, Marokkomi, Saudi-Arabiami Qatarimilu akerliussutsimik aamma takutitsisoqarpoq.
Israelip Gazami napparsimmavik Al Ahli qaartartumeersimagaa taakku pasilliutigaat.
Raketip maangaannaq ingerlasup napparsimmavimmik marlunngornermi eqquisimanissaa ilimanartoq, Israelip USA-llu oqaatigaat. Muslimit ingasasassiniat Palæstinamiut Islamisk Jihadimeersut raketimik igeriussisuusimanissaat Israelip USA-llu pasilliutigaat.
