Nunani Avannarlerni ministerit Nunani Avannarlerni Siunnersuisooqatigiit ataatsimiinnissaannut piareersartut

Island siulittaasuuffimmik tigumminninnissaminni suliniutissanik pissanganartunik pingasunik Kalaallit Nunaannut attuumassuneqartunik aallartitaqarniarpoq.

Suliniut siulleq tassaavoq Nunani Avannarlerni Issittumilu takornariaqarnermik imminut attassinnaasumik siunniussineq.

Suliniutip aappaa tassaalluni imaanit pisuussutsit atorluarnerisigut aningaasatigut annertusiartortitsinissamut tunngassuteqartoq.

Suliniullu kingulleq tassaalluni Avannaani inuusuttut siunissaat, tassani FN 2030 anguniakkamit aallaaveqarluni.

Tamanna atuarneqarsinnaavoq  nunat avannarliit suleqatigiissut  ministeriisa isiginnaarutikkut ataatsimeeqatigiinneranni
tassani Aningaasaqarnermut Nunanullu Avannarlernut Naalakkersuisoq Vittus Qujaukitsoq ataatsimeeqataalluni.  

 - Ataatsimiinnermi Islandimi suleqatiga siulittaasuuffissami suliniutinut pingasunut pilluaqquara, kalaallillu tungaannit peqataanissamut periarfissiivoq. Imminut attassinnaasumik takornariaqartsitsineq Naalakkersuisut ukiuni aggersuni pingaarnersiuillutik sinaakkusersuinerata iluaniippoq”, Vittus Qujauquitsoq taama oqaaseqarpoq.

Danmarkip 2020-mi siulittaasuuffeqarnerani Kalaallit Nunaat Savalimmiullu pingaarutilimmik inissisimapput, siulittaasuuffeqarnermilu suliassanik ingerlatsinissani peqataalluarsinnaalluni.

- Tassani Kalaallit Nunaat pingaarutilimmik inissisimalersinnnavoq umiarsuarnut aalisarnermullu tunngassuteqartunik, Nunanut Avannarlernut Suleqateqarnermut Naalakkersuisoq Vittus Qujauquitsoq taama naggasiivoq.

Nunat Avannarliit Siunnersuisooqatigiivi oktobarip ulluisa 29-annit novembarip aallaqqaataata tungaanut Oslomi ataatsimiissapput.