NunaMineralsip aningaasarliornera qaangerniarlugu suleqatissarsiortoqarpoq
Taamali oqareerluni erseqqissaassutigaa, suliffeqarfiit NunaMineralsitut suliaqartut nunarsuatsinni sumiikkaluartulluunniit allat, qaammatini makkunani aamma aningaasarliormata, taakkununngalu ilaaginnarlutik oqaatigalugu. Taamali oqareerluni, Ole Christiansenip erseqqissarpaa, aningaasaliisinnaasunik suleqatissarsiornerit maanna ingerlanneqarmata, NunaMineralsip matusariaqalersinnaaneranik ernumassutissaqarani.
- Aningaasanik nutaanik nassaanngikkuta, NunaMinerals matoriaannaavoq, kisianni aningaasaliisinnaasunik arlalissuarnik oqaloqateqareerluta maanna naatsorsuutigaarput aningaasanik nutaanik nassarsinnaassalluta, Ole Christiansen oqarpoq.
NunaMineralsip naatsorsuutai, ippassaq marsip 31-ani saqqummiunneqartut malillugit, suliffeqarfik siorna 2013-imi 60,7 millionit koruuninik amigartooruteqarpoq, aningaasallu tigoriaannaat, siorna 3,9 millionit koruuniusimasut, januaarip aallaqqaataani, 5.000 koruuniinnanngorsimasut, aviisip Berlingske Businessip ullumi allaaseraa.
- Taama naliliineq paatsoorneruvoq tassami aningaasat tigoriaannaat amerlanerugaatsiarmata. Siorna ukiup naanerani aningaasat tigoriaannaat 5.000 koruuniugaluarput, kisianni aningaasanik allanik tigoriaannarnik taakku saniatigut peqarput atorsinnaasatsinnik. Taamaattumik siunissami aalajangersimasumik ingerlasinnaanermut naatsorsuutigineqarsinnaavoq.
Nunaminerals nakkutigisassanngortinneqartoq
NunaMineralsip aningaasatigut maanna ajornartorsiorneranut pissutaaqataasunut, Ole Christiansen-ip ilaanerarpaa, NunaMineralsimut piginneqataassuteqarlutik aningaasaliisut soorlu Namminersorlutik Oqartussat, Lønmodtagernes Dyrtidsfond LD aamma Nykredit, taakku Danmarkimiittut, ukiuni kingullerni aningaasarliorsimaneri.
- Piginneqataasut taakku aningaasaliisinnaaneri ullumikkut pitsaasutut oqaatigineqarsinnaanngilaq. Taamaattumik uagutsinnut pingaaruteqarpoq, piginneqataalerusuttunik aamma aningaasaleerusuttunik allanik ujarlernissaq, tamannalumi pisimalluni. Tamatuma kinguneraa, aningaasaliisinnaanermut soqutiginnittut arlalippassuit maanna attaveqarfigatsigit.
Ole Christiansenip suliffeqarfiup aningaasarliorneranik nalilersuinereerluni, Radioaviisimut oqaatigaa, suliffeqarfiit nunarsuatsinni NunaMineralsitut suliaqartut allat aamma aningaasatigut ajornartorsiormata tupiginagu, NunaMinerals aamma taama ajornartorsiormat.
- Torontomi aningaasanik niuerfissuaq qiviaraanni, tassani nalunaarsorsimasuupput ujarassiornermik, aatsitassarsiornermik tamakkuninngalu qalluinernik suliaqartut 1.000-it sinneqartut, taakkulu amerlanersaat uagutsitorluinnaq aningaasatighut ajornartorsiorput, taamaattumik oqartariaqarpunga ajornartorsiuteqartunit kisimiinnginnatta.
NunaMineralsip pisortaata, Ole Christiansenip ilanngullugu oqaatigaa, Københavnimi aningaasanik niuerfimmi nalunaarsorneqarsimanermi saniatigut, Canadami Torontomi aningaasanut niuerfissuarmut nalunaarsorneqalersinnaanertik siunertaralugu misissuisimallutik.
NunaMineralsip piginneqataassutaat, Københavns Børsenimi ulloqeqqanut 12,5 procentimik appariarput, ualerli manna Børsen matummat piginneqataassutit qaffariarsimapput, appariaat 11,39 procentiinnanngorluni.
