Nunaminerals nakkutigisassanngortinneqartoq
Kukkunersiuisup naatsorsuutini inerniliussaqarsimannginnera pissutigalugu Fondsbørsen taama iliuuseqarpoq.
Nunamineralsip aktiaataasa nalingi ullumi ullaap tungaani 10,8 procentinik apparpoq.
Naatsorsuutit malillugit Nunaminerals 2013-imi 60,7 millionit koruuninik amigartooruteqarpoq, aningaasaataalu tigoriaannaat, siorna 3,9 millionit koruuniusut, maanna 5000 koruuniinnanngorsimallutik.
Kuultisiorneq NunaMineralsip aningaasatigut atuiffigisupilussuusimavaa, ingerlatsivilli suli isumalluarpoq:
Suliffeqarfiup suliniutaata siunissami ineriartortinnissaannut aningaasatigut toqqammavissap nikittorsarneqarnissaa pillugu NunaMinerals aningaasaliisartut soqutigisaqartullu allat aningaasaliinissaq pillugu isumaqatigiinniarfigai: Isumaqatigiinniarnerit suli ingerlanneqarput, taakkulu qanoq inerneqarumaarnersut suli nalorninartoqarluni, taamaattoq pitsaasumik angusaqarfiunissaat ingerlatsiviup isumalluarfigaa, Nunaminerals naatsorsuutimini taama allappoq.
Naatsorsuutit kukkunersiusumit akuerineqannginnerinut pissutaasoq tassaavoq NunaMineralip aningaasaatit qaffaavigineqarnissaasa tungaanut piffissami tassani aningaasaliissutaasussanik nassaarniarnissaa ajornakusoortuussammat, Berlingske Business taama inerniliivoq.
