NunaMinerals millionilikkuutaanik taarsigassarsisoq

Suliffeqarfiup misissueqqissaarnermik ingerlatsisup NunaMineralsip suliffeqarfimmit aningaasalersuisarfimmit Namminersorlutik Oqartussanit pigineqartumit 2,5 millionit koruuninik atukkerneqarnermigut, akiliisinnaassuseqarnini pitsaanerulersikkaa, aningaasanik niuerfimmit nalunaarutigineqarpoq.
Allattoq Hagen Højer Christensen, Elisa Isaksen
juulip 02-at 2014 09:18

Suliffeqarfik taamaalilluni suliniutissaminut siunissamut ungasinnerusumut aningaasalersuinissamut pilersaarusiorsinnaanngortoq, NunaMineralsip pisortaata Ole Christiansenip oqaatigaa. Atukkiunneqartut qaammammut procentimik ataatsimik erniaqartut kingusinnerpaamik aappaagu januaarip 31-anni taarserneqariissapput.

AAMMA ATUARUK NunaMinerals Greenland Holdingimit millionilikkuutaanik taarsigassarsisoq

- Atukkiinissamik neriorsuuteqartoqarneratigut, teknikkikkut paasisat NunaMineralsip isumalluarfigeqisaanut Kujataani Niaqornaarsuup eqqaani pilersaarusiamut iluaqutigineqartussaassaapput, tamatumunnga ilaallutik suliffeqarfiup saffiugassat qaqutigoortut pillugit suliniutinut arlalinnut suleqataaffigisai amerliartuinnartut, Ole Christiansen oqarpoq.

AAMMA ATUARUK NunaMineralsip aningaasarliornera qaangerniarlugu suleqatissarsiortoqarpoq

Taassuma ilaatigut Korea Ressource Corporationimik suleqateqarnertik innersuussutigaa. Suliniummi pineqartumi saffiugassanik qaqutigoortunik niobimillu ujaasilluni qillerisoqaleruttorpoq. Tamatuma peqatigisaanik NunaMinerals Paatusumi saviminissarsiornissamut nalorninartulimmut aamma Illoqqortoormiut Avannaani Ymer Ø-mi wolfram-imik aamma antimon-imik piaanissamut pilersaarutinut peqataanissaminut isumaqatigiinnialeruttornerarpaa.

Niaqornaarsuup eqqaani kuultimik ujaasilluni qillerinissat siuartinneqarnissaannut suli aningaasassarsiortoqaleruttortoq, aningaasanik niuerfimmit ilanngullugu nalunaarutigineqarpoq. 

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk