NunaMinerals Greenland Holdingimit millionilikkuutaanik taarsigassarsisoq
NunaMineralsip aningaasatigut tunngavigisai suliffeqarfiullu siunissami suliniutissaminut aningaasalersuinissaanut atatillugu aningaasanik taarsigassarsiniartoqarpoq.
Aningaasat taarsigassarsiarineqartut qaammammut 1 procentimik erniaqarput, kingusinnerpaamillu januaarip 31-anni 2015-imi taarserneqariissallutik.
Aningaasat taarsiagassarsiaritinneqartut Greenland Holdingip piginneqataassutinut nuuppai, piginneqataassutit amerlineqarnissaat ilaatigut eqqarsaatigalugu. Ukiup ataatsip matuma siornagut aamma taama pisoqarpoq, taamanimi piginneqataassutinit katillugit 138 millionit koruuniusunit, piginneqataassutit 18,5 millionit koruunit NunaMineralsip tuniniarmagit.
Suliffeqarfiup siulersuisuini siulittaasup Birks Bovairdip Greenland Holdingimit taarsigassarsiarineqartut naammagisimaarpai, tamannami aningaasaliisartunut allanut pitsaasumik nalunaarutaammat.
- Taama neriorsuuteqartoqarnera NunaMineralsip Kujataani Niaqornaarsuup eqqaani 2013-imi kuultimik ujaasinerani neriuuteqarnartumik angusaqarneranut ersiutaavoq. Tamatumalu peqatigisaanik suliniutip ingerlateqqinneqarnissaanut aningaasatigut tunngaviusinnaassasut, siulersuisuni siulittaasup oqaatigaa.
Ilanngullugulu oqaatigalugu Qeqertaasami saffiugassanik qaqutigoortunik misissuinissamut suliffeqarfiup peqataaffiginiagaanut aningaasat taarsigassarsiarineqartut aningaasalersuinissamut qulakkeerinnissutaasinnaassasut.
