Politikki Inuussutissarsiutit

NunaMinerals februaarimi matoriaannaavoq

Aatsitassanik misissueqqissaarnermik ingerlatseqatigiiffik NunaMinerals ingerlatsinissaminut 4,5 millionit koruuninik Naalakkersuisuugallartunit qaammatip siuliani taarsigassarsitinneqarpoq. Piffissarli sivikitsuinnaq qaangiuttoq taarsigassat millioninik ilaneqarnissaannik maanna qinnuteqaqqippoq.

Allattoq Sara K. Jakobsen

decembarip 03-at 2014 12:24

NunaMinerals 4,5 millionit koruuninik namminersorlutik oqartussanit taarsigassarasitinneqarnikuuvoq, ukiumi nutaami januaarip naalernerani utertitassaminik. Taarsigassat ilanissaannik qinnuteqarnera piffissap sivikitsup iluani pigaluartoq, siulersuisuni siulittaasoq Birks Bouvard neriulluarpoq.

- Naalakkersuisut taarsigassiissutigeriigaat qujamasuutigaagut. Taakkuli 2015-imut januaarip naaneranuinnaq ingerlatsinissamut naammaqqatassapput, tusagassiorfinnut nalunaarummi Birks Bouvard taama allappoq.

Aamma atuaruk NunaMinerals aningaasatigut ikiorsiissuteqarfigineqartoq

Aamma atuaruk Nunaminerals Naalakkersuisuinit naammagittarfigineqarpoq

- Siunissaq ungasinnerusoq eqqarsaatigalugu aaqqiissuteqarnissaq piumasarineqarpoq, NunaMinerals allappoq.

Nunarput Naalakkersuisuugallartunit ingerlanneqarpoq. Naalakkersuisunngortitsinissallu tungaanut aatsitassanut naalakkersuisuugallartup Finn Karlsenip oqaatigaa NunaMineralsimut taarsigassiinissaq maanna suliassarinagu, utaqqiisaaginnartumik naalakkersuisuunini pissutigalugu.

- 4,5 millionit koruuninik taarsigassinneqarnera sulissutigereerpara, Finn Karlsen KNR-imut oqarpoq, tassungalu atatillugu oqaaseqaqqinnissani kissaatiginagu.

Nutaamik aaqqiissuteqarnissamut neriuuteqartut

NunaMineralsimut taarsiissutigineqartut amerlineqassappata Naalakkersuisunngortussat inatsimmik nutaamik siunnersuuteqaqqaartariaqassapput, taamaaliortoqassappallu Inatsisartut tamanna suliarissallunikku ukiaanerani ataatsimeereernerminni, februaarimi marsimiluunniit ingerlanneqartussami.

Tamanna NunaMineralsimit ilisimaneqarpoq, taamaakkaluartoq ingerlatsivik annaakkusullugu aatsitassanut naalakkersuisuugallartumut saapput.

- Nalakkersuisut isumallualersitsinerat nuannaarutigaarput, nutaamilli aaqqiissuteqappallakkumaarluta neriuppugut, siulersuisuni siulittaasoq, Birks Bovaird allappoq.

Nutaarsiassami kukkunermik nassaarsimaguit uunga allaffigineqarsinnaavugut.