Nunaminerals aningaasassaaleqivoq

Nunaminerals ukiup affaani siullermi naatsorsuutiminni, 3,2 million koruuninik amigatooruteqarpoq, ukiorlu manna tamakkerlugu, 5 million koruunit 10 million koruunillu akornanni amigartooruteqarnissaq natsorsuutigineqartoq, pisortap Ole Christiansenip oqaatigaa.
Der skal masser af penge til at få økonomien til at køre. Assi © : KNR
Allattoq Apollo Jeremiassen
aggustip 12-at 2014 13:20

Nunamineralsip naatsorsuutaani aamma atuarneqarsinnaavoq, Nanortallip eqqaani Niaqornaarsunni kuultisiornerup ingerlatiinnarneqarsinnaaneranut aningaasaliisussanik suli ujarlertoqartoq.

AAMMA ATUARUK NunaMinerals millionilikkuutaanik taarsigassarsisoq

- Ilisimaneqareersutut Nunaminerals qaammatini kingullerni arlaqalersuni aningaasakilliortualersimavoq. Aatsitassarsiorluni misissueqqissaarnernut aningaasaliisussarsiniarneq nunarsuatsinni tamani manna ajornartorsiutaavoq, aamma uangutsinnut.

Nunamineralsip pisortaa, Ole Christiansen oqarpoq nassuiaallunilu aningaasaliisussarsiornertik suli ingerlallugu, tamannali ajornakusooqisoq aamma oqaatigalugu.

Qanittukkut iluatsitsinissartik neriuutigaat
- Aaqqiissutissanik suli nassaanngilagut. Oqaatigisinnaasatuaralu tassaavoq, aningaasaliisinnaasorisinnaasagut maanna isumaqatigiinniarfigigatsigit, taamaattumik neriuutigaarput qanittukkut iluatsitsiumaarluta, Ole Christiansen oqarpoq.

Suna tamarmili ajortuinnaanngilaq, tassa Nunamineralsip maanna suleqatini, aatsitassarsiorfiutileqatigiit, KORES, taakku Korea Kujallermiut, peqatigalugit misissueqqissaarnerit ingerlakkamikkit.

- Maniitsup eqqaani Qeqertaasami qillerinerput 2000 meterisut ammut takitigisoq, koreamiunit aningaasaliiffigimeqarpoq.

Niaqornaarsummi kuultisiornermut aningaasaliisussarsiorneq
Kujataani Nanortallip eqqaani Niaqornaarsummi kuulitisiornermut aningaasaliisussarsiorneq ajornakusoorsimasoq, Ole Christiansenip oqaatigaa, taamaattorli siunissaq qaamanerulaalersimasoq aamma oqaatigalugu.

- Pilersaarutinik tutsuiginarluinnartunik maanna ingerlataqarpugut, tamassumunngalu takussutissaavoq, suliffeqarfinnik marlunnik suleqateqalernerput upernaaq manna aallartikkatsigu, Nunamineralsip pisortaa, Ole Christiansen oqarpoq.

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk