ASSIT Nuna tamakkerlugu katersuiniarnermi ilimagisat qaangerneqartut
Nutartigaq ataasinngorneq 6.3: Aningaasat aatsaat taama amerlatigisut katersuiniarnermi katersorneqartut siusinnerusukkut allakkaluarparput. Tamannali ilumuunngilaq. Ukioq 2015-imi katersiniartoqarmat 2.5 millionit koruunit missaat katersorneqarnikuupput.
1.655.892 koruunit. Tassa NAKUUSA-p ippassaq katersuiniarnermi angusai. Meeqqanik inuusuttunillu kinguaassiutitigut atornerluisarnermik akiuiniarluni, Nuummi Katersortarfimmit toqqaannartumik aallakaatitsisoqarnerani aningaasat katersorneqarput, aningaasallu ilimagisamit amerlanerusut katersorneqarlutik.
Kalaallit Nunaanni innuttaasup ataatsip agguaqatigiissillugit 29 koruuninik taamaasilluni tunisivoq, Danmarkimilu kingullermik katersuisoqarneranut sanilliukkaanni nunatsinni innuttaasoq marloriaatingajammik tunisivoq, Danmarks Indsamlingimik taallugu Danmarkimi kingullermik katersisoqarmat innuttaasup ataatsip agguaqatigiissillugit 16 koruuninik tunissuteqarami.
AAMMA ATUARUK NAKUUSA unnugu katersuinialerpoq
Angusat nuannarineqarput
Tallimanngornermi katersuiniarnermi angusat Isumaginninnermut naalakkersuisup Sara Olsvigip nuannaarutigai:
- Unnuk nuannerluinnarpoq, angusarineqartullu tulluusimaarutissaapput, Sara Olsvig oqarpoq, nangillunilu:
- Kinguaassiutitigut atornerluisarnerup akiorniarneqarnissaata Kalaallit Nunaanni pingaartinneqarneratut isigaara, Sara Olsvig oqarpoq.
Kinguaassiutitigut atornerluisarneq Nunatsinni ajornartorsiutaavoq akiorniarneqartariaqartoq, suliniutillu assigiinngitsut naalakkersuisunit aallartinneqareerput.
NAKUUSA tassaavoq Namminersorlutik Oqartussat Naalagaaffiillu Peqatigiit meeqqat pillugit suliniaqatigiiffiata UNICEF-ip Danmarkimi immikkoortortaanik suliniutit assigiinngitsut pillugit suleqatigiiffiat. Aningaasallu ippassaq tallimannngornermi katersorneqartut meeqqanik inuusuttunillu kinguaassiutitigut atornerluisarnermik akiuiniarnermi atorneqassapput.
AAMMA ATUARUK Unicef med i kampen mod overgreb
Aningaasat katersat, meeqqat kinguaassiutimikkut atornerlugaasimanerinik pasitsaassaqarnermi angajoqqaanut inersimasunullu qanigisaasunut qanoq iliuuseqarnissamut paasissutissanik suliaqarnissamut atorneqassapput.
