Nuna tamakkerlugu arsaannermi sungiusaasunngortoq coronap aporfissippaa
![](/sites/default/files/styles/image_934x467/public/article_images/uuuu_002.jpg?itok=SMREgt8z)
Morten Rutkjær arfininngornermi ualikkut Nuummut tikippoq maannalu Kalaallit arsaattartut kattuffiat KAK Nuummilu peqatigiiffilerisut oqaloqatigalugit.
AAMMA ATUARUK KAK får ny landstræner til fodboldlandsholdet
Sungiusaasutulli aallartinnera Nunatsinni pissutsit aallaavigalugit allaaneruvoq. Nunanut allanut unammisartuni toqqarallakkat GM naammassigaangat saqqummiunneqakkajukkaluarput. Coronali pissutigalugu ukiormanna GM-rtoqarnissaa ullorsiutiniit peerneqarallarpoq aammalu kommuneqatigiinngitsut arsaannermi katerisimaarsinnaanatik. Taamaattoq toqqarallakkat saqqummiunneqassamaarput.
- Maanna allamik iliuuseqarsinnaannginnatta pissutsit sapaatip akunnikkaartumik qaammatikkaartumilluunniit nalilersortariaqarpagut. Uanga suliassaraara sungiusaatigalugu unammminerit sungiusarnerillu malinnaaffiginissaat tamakkulu aallaavigalugit unammisartussanik toqqaanissaq. Tassa taanna aallaavigissavarput, Morten Rutkjær KNR-mut oqarpoq.
Ujammit imaluunniit…
Kalaallit arsaattarnerat takornartarinngilaa. Ukiut tallimat matuma siorna Nunatsinnut siullerpaamik tikippoq oqalugiariartorluni. Holbækimi arsaannermut ilinniarfiuteqarpoq tamannalu kalaallit arsaattartut arlallit siuarsarfissamittut toqqartarpaat.
Sapaatip akunnera kingulleq KAK nalunaarpoq aappaagu tuluit qeqertaanni Guernseymi qeqertarmiut unammiuaarnissaanni angusarissaarnissaq naatsorsuutigineqartoq. Angusarli pitsaasoq sunaava?
- Imaattuaannartariaqanngilaq normu 1-uneq imaluunnit normu 2-juneq aallaaviussasut. Sungiusarsimasattali aammalu kalaallit arsaattarneranni atorneqalersussatut piareersaatit Island Gamesimi takuneqarnissaat aamma pitsaasuussaaq, Morten Rutkjær oqarpoq.
Taassuma isertuutinngilaa saassussiniarsarisaqattaarluni arsaateriaaseq nuannaralugu, tamannali aatsaat naammassineqarsinnaavoq patajaatsumik assersuisoqaraanni.
Coronap sunik atugassaqartitsinera arsaannermi nunanut allanut unammisartut suliaqartarnissaannut sunniutissaaq. Pilersaarutaavorli ukiortaartinnagu nunanut allanut unammisartut marloriarlutik katersuutsinnissaat.