Video Qatserisartut nuna ikuallattoq qamilluinnalerlugu nuannaarutigigaat

Qatserisartut Nunatsinneersut aamma Danmarkimi upalungaarsimanermut aqutsisoqarfimmeersut 38-t nuna ikuallattoq qamilluinnalerpaat.

Kisianni qaqqap sinaani qatsissuni suli ataasiakkaanik annikitsunik ikumasoqarpoq. Ikumanerit anguneqarsinnaasuugunik ajornanngitsumik qaminneqarsinnaangaluartut, upalungaarsimasut aqutsisuat Danmarkimeersoq, Claus Jakobsen, oqarpoq.

Nunallu sakkortuumik ikuallanneranik, nalinginnaanngitsumik sukkassuseqarluni ammut sapaammi siaruartumik, qamitsinnerminnik qatserisartut Sisimiuneersut avannaaneersullu nuannaarutiginninnerat takuneqarsinnaavoq.

Qaqqalli naqqa tallimanngornermi ullaaralaakkut ikuallannermut killilerneqarpoq. Nunamut kapuutit atorlugit killiliineq ingerlanneqarpoq. Kapuutimmi atorlugit qatserisartut nunap iluanut seqitsisinnaapput, taamaalilluni nunap ilua nillusarneqarlunilu issumik ikumasoqarpat qamiterisoqarsinnaalerluni.

- Qimerlooraanni takuneqarsinnaavoq ikumasut annertunerpaartaat takussaajunnaartut. Pujuliortut aamma annikitsuinnanngoqqapput. Taamaammat qamisaaneq ingerlalluarpoq. Maannalu nunap iluatigut innermik siaruartoqarsinnaanera, taamaalillutalu ikummaqqittoqarsinnaanera pinngitsoortinniarlugu, killiffilersuivugut, Claus Jacobsen oqarpoq.

Danmarkimi upalungaarsimanermut aqutsisoqarfimmeersut suli nalilersinnaanngikkallarpaat Kangerluarsuk Tullermi isummaallisaanertik qaqugu piariissanerlugu.

Kisianni qatserisartut avannaaneersut aamma qatserisartut ataasiakkaat Sisimiuneersut tallimanngornermi ullaap tungaani angerlarput. Uanilu videomi takusinnaavat qatserisartut ilaat Kangerluarsuk Tullermit avalannermini pingasoriarluni seqqorluni inuulluaqqusisoq.