Nukissiorfiit politiinut suliassanngortitsisoq: 443.000 koruuninik peqquserluttoqartoq

Nukissiorfinni 443.000 koruuninik peqquserluttoqarsimaneraallutik politiinut unnerluutiginnipput. Pisiat allagartaannik salluliuutaasunik avataanit atuinikkut peqquserluttoqarpoq.
Namminersorlutik Oqartussat pigisaat, Nukissiorfiit pisiat allagartaat atorlugu 443.000 koruuninik peqquserluffigineragaavoq.
Allattoq Bibi Nathansen
oktobarip 28-at 2021 16:50

Nukissiorfiit aningaasanik peqquserluttoqarsimaneraallutik politiinut suliassanngortitsivoq. Politiillu Nukissiorfimmi aningaasanik peqquserluttoqarsimaneranik martsip ulluisa arfineq pingajuanni unnerluutiginnittoqarsimanera KNR-imut uppernarsaavoq.

Namminersorlutik Oqartussat pigisaat, Nukissiorfiit pisiat allagartaat atorlugu 443.000 koruuninik peqquserluffineqarpoq.

Nittartakkatigut tusagassiorfik Sermitsiaq.AG taama allaaserisaqarpoq.

Nukissiorfiit 442.776,44 koruuninik peqquserluffigineqarsimallutik Inatsisartut Kukkunersiuinermik ataatsimiititaliaannut paasissutissiipput.

Suliaq atorfeqartunut kinguneqartitsissutaanngitsoq nukissiorfiit ataatsimiititaliamut ilanngullugu paasissutissiissutigaat.

AAMMA ATUARUK Nukissiorfiit millionilikkaanik amigartoornermut: Bilimiippugut iluarsaanneqartariaqartumi

KNR-ip Nukissiorfiit qullersaqarfia ullaap tungaa tamaat apersorniarsaraa.

- Suliaq politiinut unnerluutigaarput, suliaq naammassitinnagu tamaallu ataatsimut takusinnaalertinnagu oqaaseqarsinnaanngilagut, Nukissiorfiit aningaasaqarnermut pisortaat, Pierre Vassard KNR-imut oqarpoq.

Suliami qanorpiaq pisoqarsimanera soorlu suliamut atatillugu kinguneqartitsisoqannginnera KNR-ip ilatigut apeqqutigerusukkaluarpaa. Apeqqutigineqartut tamarmik assigiimmik akissuteqarfigineqarput – tassa suliap politiinit naammassineqartinnagu Nukissiorfiit oqaaseqarusunngillat.

Apeqqulli ataasinnguaq akissuteqarfigineqarpoq.

Kina matumani akisussaasuua?

- Qullersaqarfik akisussaanerpaavoq, Pierre Vassard oqarpoq.

- Najoqqutassat periutsillu suliffiup iluani atorneqartut unioqqutinneqanngisaannarnissaat sulisunut sakkortuumik ilisimatitsissutigineqarsimavoq, atortullu avaqqullugu akilerneqartussanut akiliutissat AKUERINEQANNGISAANNASSAPPUT, Nukissiorfiit Kukkunersiuinermut ataatsimiititaliamut akissummini ilaatigut allapput.

KNR-ip Kukkunersiuinermik ataatsimiititaliap siulittaasua, Mariia Simonsen (IA) attaveqarfigaa, taassumali pissutsit aalajangersimasut oqaaseqarfigisinnaanngilai.

Aamma atuaruk