NUKAKA: Suleqatigiitta
- Nunatsinni katersugaasiviit Katuffiat NUKAKA pisortat pigisaannik tikeraat ornittagaannik takornariartitsivinnillu pilersitsinissamut toqqissisimanngilaq.
Taama oqarpoq, Kalaallit Nunaanni Katersugaasiviit kattuffianni NUKAKA-mi siulersuisunut ilaasortaq Christine Løventoft.
Tikeraat ornittagassaannik takornariartitsivinnillu ineriartortitsinissamut Kalaallit Nunaanni katersugaasiviit peqataarusupput, taakkua pilersinneqarnisaannut Naalakkersuisut pilersaaaruteqareermata.
Aningaasaliisoqartussangormat iluarineqartoq
- Pilersaarutigineqartumut aningaasaliisoqarniarmat NUKAKA qilanaarpoq, tamassumami pitsanngorsaavigineqarnisaa pisariaqarluinnartutut isumaqaratta, taamaattumik isumaqataalluinnarpugut, NUKAKA-mi siulersuisunut ilaasortaq, Christine Løventoft oqarpoq nangillunilu:
- Sumiiffinni katersugaasiviit ilapertuutaasinnanerat Namminersorlutik Oqartussanit eqqarsaatigineqarpasinngilaq.
- Isumaqarpugut tamanna uggornartupilussuussoq, katersugaasiviimmi pioreersut katersugaasiveqarfillu suleqatigalugit inerartortitsisoqarsinnaanera isiginiarneqarsimanngimmat, soorlu nunani allani katersugaasiviit taamaattartut, Sisimiut katersugaasivianni aqutsisuusoq, Christine Løventoft oqarpoq.
Sisimiuni Kangerlussuarmilu katersugaasiviit takornarianik 5000-it missaanniiittunik ukiumut pulaarneqartarput.
Tassuma nassuerutigalugu oqaatigaa, Kalaallit Nunaanni illoqarfinni katersugaasiviit nunani allani katersugaasivinnut sanilliullugit eqqumiitsuliat nutaaliaanerusut kulturilkkullu saqqummersinniarneqarnerini kinguarsimanerummata,
Katersugaasiviit akimmiffeqartut
Katersugaasivittut nutaliaasutut tassalluta naleqquppallarunanngilavut, sulisugut ikittuinnaammata katersugaaviillu inissakitsut niuertorusoqarfiit illuutikui katersugaasiviiugajuttarmata, Christine Løventof oqarpoq, taassumma eqqaasitsissutigaa, katersugaassivinni takornarianit takuniarneqarsinnaasunik katersugaaterpassuaqartoq,
- Suunukua saqqummersinniarigut? aamma suunukua paasissutissiissutiginiarigut ? Løventoft aperivoq.
Kulturikkut oqaluttuarisaanermit pigisat katersugaasivinniipput, taamaattumik tikeraat ornittagaannik illorsuarni qarasaasiakkut takutitsivilerluni saqqummersitsisarnissaq isumassaqartinngilarput, katersugaasivinni suli katersugaateqartillugu, Løventoft oqarpoq.
Taamaattumik suleqatigiittoqartariaqarpoq katersugaatinik pitsaasumik takornarianut paasissutissanik suliaqarluta, isumaqarpunga tamanna amigaataasoq, Sisimiuni katersugaasivimmi aqutsisoq , Christine Løventoft oqarpoq.
Aningaasanut inatsimmi ukiormannamut atuuttumut tre milliuunit koruunit immikkoortinneqarput ,ukiunilu tulliuttuni Kalaallit Nunaanni tikeraat ornittagassaanut pilersaarusiortoqalissallunissaaq.