Nuikimi atuartut aqqanillit angusarissaarlutik allagartartaarput

Nunatsinni nunaqarfinni inuusuttut Meeqqat atuarfianni 10. klassip qaffaseqataanik atuartinneqarnissaannik Nuiki neqerooruteqarpoq.

Niaqornaarsummi 14-it, Attumi 15-it Tasiusamilu 14-it siorna soraarummeerput. Nunaqarfimmilu Kuummiuni aqqanillit maanna aamma soraarummeeqqammerput.

Suliniut ukiumi atuarfiusumi matumani Kulusummi Qeqertarsuatsiaanilu aamma ingerlanneqarpoq.

Atuartut 10. klassip qaffaseqataanik kalaallisut, danskisut, tuluttut matematikkimillu atuartinneqarput. Aammattaaq ilaqutariinneq pillugu pikkorissartinneqarsimapput Danmarkimilu ilinniarfeqarfinnut tikeraartinneqarsimallutik.

- Sakkortuvoq, qaammatilli qulingiluat atorlugit ilungersorlutik atuareerlutik maanna soraarummeerutaasumik misilitsinnermi angusarissaartupilussuupput. Angusaat allat angusaannit agguaqatigiissitsinikkut qaffasinnerupput, Jens Borch Scharnberg Kuummiunit taama allappoq.

Atuartut taakku AEU-mik taaneqartoq naammassivaat, tassalu inuussutissarsiutitigut ilinniarnissamut piareersarfiusumik soraarummeerneq.

Kuummiuni Nuikimi atuartut maanna avissaartussanngorput - ilaat inuussutissarsiutitigut ilinniakkamik aallartitsissapput allallu Danmarkimi højskolissallutik.

Nuiki 2017-ip tungaanut aningaasaliiffigineqarsimavoq. Nunaqarfinnilu aqqaneq-marlunni atuartitsinermik suliniutit ukiumik ataatsimik sivissuseqartut ingerlanneqarnissaat siunertarineqarpoq, taamaaliornikkut inuusuttut 180-it atuarnissaat anguniarneqarluni. Suliniut Willumip Aningaasaateqarfianit aningaasalersugaavoq atuartullu akeqanngitsumik internetteqartinnerat Telemit aningaasalersugaalluni.