Danmarkimit timmisartumut ilaasoq: Annilaaqqalaarpugut
Kangerlussuup mittarfiani timmisartumut ilaasut marluk coronamik tunillatsissimasinnaasutut misissorneqaleruttorput. Ilumut tunillatsittoqarsimanersoq suli ilisimaneqanngilaq – tunillatsissimasinnaanerallu pasitsaanneqaannarluni.
Regina Mathiasen Norsamut Kangerlussuarmut qulinngunngitsiartoq tikittumut ilaavoq. Taassuma annilaaqqalaarluni KNR-imut oqaatigaa.
- Tassa eqqissisimaniarsarerpaluppugut, kisianni soorunami tuppaqqagatta naluarput qanoq iliussanerluta, Regina Mathiasen KNR-imut oqarpoq.
AAMMA ATUARUK Air Greenland timmisartumi corona pillugu pasitsaassoqartoqarneranut: Isumannaatsuunissaq ernumanarnerpaavoq
Taassuma ilaasut Københavnimiit ingerlaarnerminni ilisimatinneqarsimanngitsut oqaluttuaraa. Mittarfimmullu mereerlutik aatsaat pasitsaassaqalersimavoq:
- Aatsaat mikkatta niunialeruttorluta ingeqquaatigut utimut, politiinngooq misissueqqaarnissaat pissutaalluni, timmisartumi ilaasoq oqarpoq.
Regina Mathiasen Kangerlussuarmi.
Timmisartoq miffigisartakkaminut nalinginnaasumut minngivoq. Ungasinnerusumut ingerlaannarpoq, ilaasullu tikittarfimmut bussinik ingerlanneqarlutik.
- Soorunami tupappugut, Regina Mathiasen oqarpoq.
- Eqqissisimaniarsarivunga, timerali sajulaarpoq.
Ilaasut aneqqusaajunnaarsinneqartut
KNR-ip paasissutissarsiai naapertorlugu ilaasut ilaat timmisartumit suli nioqqusaanngillat. Ilaasut ilarpassui allat maanna tikittarfimmiipput paasissutissarseqqinnissartillu utaqqillugu. Taakku timmisartumi aarlerinaatikinnerusumiissimasut ilisimatitsissutigineqarpoq.
Politiit oqarnerat naapertorlugu coronavirusimik tunillatsissimasinnaasut Kangerlussuarmi mattunneqarput. Taakku coronavirusimik tunillatsissimanersut paasiniarlugit tigusiffigitinnerisa Danmarkimut nassiunneqarneranni peqqinnissaqarfimmi sulisunit nakkutigineqarallassapput. Tigusiffigineqarnerisa inerneri aqsgu paasineqarnissaat politiit naatsorsuutigaat.
AAMMA ATUARUK Coronavirusimik tunillatsissimasinnaasumik Kangerlussuarmi mittarfimmi pasitsaassaqartoqartoq
Tunillaassortunik nappaalasoqarneranut ataatsimiititaliarsuup timmisartumi ilaasut sulisullu tunillatsissimasinnaanerup kingornalu tunillaassuilersinnaanerup aarlerinassusaa malillugu immikkoortunut inississimagai, politiit uppernarsarpaat.
Aarlerinaateqarnerusut aarlerinaatikinnerusullu
Timmisartumi ilaasut sulisullu immikkoortunut marlunnut immikkoortinneqarput: ”Aarlerinaateqarnerusut” aamma ”Aarlerinaatikinnerusut”.
Ilaasut Tunillaassortunik nappaalasoqarneranut ataatsimiititaliarsuarmit ”aarlerinaateqarnerusutut” nalilerneqartut angalanertik apuuffissaminnut ullut marlunngortinnagit apuussinnaagunik angalaqqissinnaapput. Tamatuma kingorna nammineq qinikkaminnik angerlarsimaffinnit aninaveersaalissapput, nunattalu nakorsaanerata ersiutaasinnaasunik nakkutinninnissaannik ilitsersuuteqarfigai.
Ilaasut ”aarlerinaatikinnerusutut” nalilerneqartut angalanertik nangeqqissinnaavaat, ersiutaasinnaasunillu nakkutinninnissamut aamma ilitsersorneqarput.
Coronavirusimik tunillatsissimanermi kissarneqarneq, quersorneq, anersaartorniarnerup ajornarnera, niaqorlunneq saarngerinerlu ersiutaakkajupput.