Coronavirusimik tunillatsissimasinnaasumik Kangerlussuarmi mittarfimmi pasitsaassaqartoqartoq
Coronavirusimik tunillatsissimasinnaasumik Kangerlussuarmi misissuileruttortoqarpoq.
Tamanna Tunillaassortunik nappaalasoqarneranut ataatsimiititaliarsuup siulittaasuata, politeeqarfimmi pisortap, Svend Foldagerip KNR-imut uppernarsarpaa.
- innuttaasut nunami aarlerinaatilimmeereerlutik nunatsinnut uternerminniit ulluni 14-ini tulliuttuni angerlarsimaannaqqusaapput.
- innuttaasut nunami aarlerinaatilimmeereerlutik nunatsinnut utersimasut napparsimmavinnut, utoqqaat illuinut illuutinullu allanut aarlerinaateqarfiulersinnaasunut ornigutinnginnissaat innersuussutaavoq.
Nunat aarlerinaatilittut pineqartut makkuupput:
- Italiami nunap ilai Emilia-Romagna, Lombardiet, Piemonte Venetolu
- Irani tamarmi
- Kina (Hong Kong, Macau Taiwanilu minillugit)
- Korea Kujallermi nunap immikkoortua Gyeongbuk tassanilu illoqarfissuaq Daegu
Tusarfik: Nunatta tunillaassortunik nappaalasoqarneranut ataatsimiititaliarsua, Danmarkimi peqqissutsimut aqutsisoqarfik
Ilumut tunillatsissimanersoq suli paasineqanngilaq. Pasitsaassaqartoqarneruinnarlunilu.
Politiit oqarnerat naapertorlugu inuit marluk Air Greenlandip timmisartuutaanut Danmarkimit Kangerlussualiartumut ilaasut coronavirusimik tunillatsissimasutut pasitsaanneqarput.
Taamaammat oqartussat iliuusissatut isumaqatigiissutaasut naapertorlugu iliuuseqalerput.
- Innuttaasut peqqissusaat isumannaannissaallu pissutigalugit nakorsaanerup peqqinnissaqarfiullu nunatsinni politiit suleqatigalugit qanoq iliuuseqartoqarnissaanik naliliiniarneranni timmisartoq Kangerlussuarmi mittarfiup kujataatungaanut inissinneqarpoq, politiit tusagassiuutinut nalunaarummi allassimapput.
Coronavirusimik tunillatsissimasunik nunatsinni suli paasisaqartoqanngilaq. Tunillatsissimasut Danmarkimi maanna 59-iupput inuillu 770-it angerlarsimaffimminnit aneqqusaajunnaaqqallutik.
Tunillaassortunik nappaalasoqarneranut ataatsimiititaliarsuup innersuussutini tallimanngormat nutarterpai, aaqqissuussinerillu 1000-init amerlanerusunit peqataaffigineqartut taamaatiinnarneqarnissaat maanna kaammattuutaalluni.
Aaqqissuussinerit 1000-init amerlanerusunit peqataaffigineqartut:
- Tunillaassortunik nappaalasoqarneranut ataatsimiititaliarsuup kinguartinneqarnissai taamaatiinnarneqarnissaanut kaammattuutigaa. Kaammattuuteqarneq marsip naanissaanut atuuppoq.
Aaqqissuussinerit 1000-init ikinnerusunit peqataaffigineqartut:
- Aaqqissuussisut tuniluuttoqarnissaata aarlerinarnera pissutigalugu aaqqissuussinissamik kinguartitsisoqassanersoq taamaatitsiinnartoqassanersorluunniit aalajangertariaqarpaat. Inuit amerlasuut ataatsimoorneranni aaqqissuussinermilu peqataasut timikkut qaninneranni tunillaassortoqarnissaa aarlerinarnerussaaq.
- Tamatuma saniatigut illup iluani aaqqissuussinerit silami aaqqissuussinernit tuniluuttoqarnissaanut aarlerinarnerussapput.
- Aaqqissuussinernik anginerusunik aaqqissuussisut peqataasussat anersaartorfitsigut tunillatsissimanermik takussutissaqartut (quersorneq tangajornerlu) peqataanissaat innersuunneqanngitsoq ilisimatitsissutigisariaqarpaat.
- Sprittit assammut saligut allarutissiallu qaqorsaatillik piareersimasuutinneqassapput.
- Issiaviit nalinginnaasumit ungasinnerutillugit inissinneqassapput.
