Air Greenland timmisartumi corona pillugu pasitsaassoqartoqarneranut: Isumannaatsuunissaq ernumanarnerpaavoq
Air Greenlandimut ilaasut marluk coronavirusimik tunillatsissimasutut pasitsaanneqarput.
Taamaammat Air Greenlandip iliuusissaasinnaasut tamarmik oqartussat qanimut suleqatigineratigut aallartikkai, timmisartuutileqatigiiffik tusagassiuutinut nalunaarummi paasissutissiivoq.
- Sukkulluunniit ineriartortoqarneranut malinnaalluarpugut, aammalu ilaasutta isumannaatsuunissaat toqqissisimanissaallu annilaangatitta annersaraat. Kalaallit Nunaanni Peqqissutsimut Naalakkersuisoqarfik attaveqarfigilluarparput, aammalu ilitsersuutai sukkulluunniit malippagut, tusagassiuutinut nalunaarummi allassimavoq.
Ilaasut taakku timmisartumut GL779-imi ilaasuupput. Timmisartoq taanna Kangerlussuarmut ullaaq 09.57 tikippoq.
AAMMA ATUARUK Coronavirusimik tunillatsissimasinnaasumik Kangerlussuarmi mittarfimmi pasitsaassaqartoqartoq
Timmisartorsuarmi ilaasunit marluk Kangerlussuup mittarfiani misissorneqaleruttortut ullaap tungaani qulit kingorna nalunaarutigineqarpoq.
Maannamut pasitsaassaqartoqaannarpoq. Tamanna politeeqarfiup pisortaata aamma tunillaassortunik nappaalasoqarneranut ataatsimiititaliarsuarmi siulittaasup, Svend Foldagerip uppernarsarpaa.
Timmisartumi ilaasussat nammineq aalajangikkamik pinngitsaaliissummilluunniit aneqqusaajunnaassappata imaluunniit sapaatini-akunnerni kingullerni tunillaassuuffiusutut nalunaarutigineqarsimasuniissimappata taakku angalanissamut billettiisa allanngortinneqarnissaat, Air Greenlandip isumaliutigisinnaavaa.