Norgemi DM: Kalaallit peqataasut aatsaat taama amerlatigisut

- DM-imut peqataasut tamarmik pitsaasumik nalilerpakka. Aamma unamminerup tungaatigut pitsaasumik angusaqarput kiisalu ataatsimoornerup tungaatigut taavalu ataqatigiinnerup tungaatigut aamma pitsaasorujussuarmik inernerqarpoq, Jonas Jensen, Kalaallit Nunaani Sisorartartut kattuffianni ujakkaartartunut tunngasunut ataatsimiititaliameersoq oqarpoq.

Ujakkaartartut januarip 26-ianit februaarip aallaqqaataata tungaanut Norgemi pissartanngorniunneranni kalaallit peqataasut aatsaat taama amerlatigalutik 92-iupput.

Ukioq kingulleq 20-30-illu akornanni peqataapput.

- Ukiuni siuliini nikerartorujussuusarpoq. Ukiut kingulliit qulit qiviarutsigit agguaqatigiisillugu kalaallit qulit 20-llu tungaanut peqataasarput.

DM-imi peqataasut katillugit 276-iusut Danmarkimeersuupput, Sverigemit, Norgemit kiisalu nunatsinnit.

AAMMA ATUARUK Inuuna på tre år deltog til DM i langrend

Kalaallit angusaat peqataasunit nersualaarneqarluarsimasut, ujakkaartartut ataatsimiititaliaat tusagassiutinut allappoq.

Angusat www.dmlangrend.dk -mut alakkarneqarsinnaapput.

Meeqqat inuusuttullu

Nunatsinni ujakkaarneq soqutiginarsarniarlugu ilaasortallu ukiuni tallimani kingullerni ikileriarsimanerat peqqutigalugu meeqqat inuusuttullu ukkatarineqarnerulerput.

- Naqqaninngaanniit aallartissimavugut siuarsaaneq, inerisaaneq taavalu ujakkaartartuunerup nunannersuunera kikkunnut tamanut siammartikkusullugu. Taamaammat meeqqat inuusuttuaqqallu taakku aallaavigisimavagut taakkuummata siunissami ingerlatsisussat.

Meeqqat inuusuttullu DM-imi angusarissaarput, sølvinik, bronzenik guldtinillu saqqarmiortaartoqarluni.

Ilorraap tungaanut

- Angusaatigut takuneqarsinnaavoq ilorraap tungaanut aallariartortugut sisorarnerup tungaatigut. Meerarpassuit angusaat ajunngittorujussuupput ataatsimut isigalugu, Jonas Jensen oqarpoq.

Taanna nangippoq 2026-imi World Cupimi, VM-imi OL-imilu peqataasinnaasunik nunanut allanut unammisartoqalernissaq kattuffiup siunniuppaa.

AAMMA ATUARUK Ujakkaarluni DM-ertoqarnerani nunatsinneersut kuultinnattut

Ukioq mannalu DM-imut peqataaneq nunatsinnut isumalerujussuusoq, Jonas Jensenip oqaatigaa.

- Isumalerujussuuvoq aamma kattuffittut ineriartortutut. Pingaaruteqartorujussuuvoq ingammik meeqqanik inuusuttuaqqanillu piukkunnaatilinnik suliaqarnitsinni taamatut nunanut allanut unammiarnermut misilittaatitsineq.

Nunatsinnit ISP Ilulissat, ASP Aasiaat, SSP Sisimiut, KS-69 Maniitsoq, NUP aamma NSP Nuuk, QUP Qeqertarsuatsiaat, kiisalu QSAP Qaqortoq peqataapput.