Politikki Inuussutissarsiutit

Norgemi aalisartoq: Allaanngilaq lottomi eqquiinnallarluni

Norgemi aalisartut inuusunnerit aalisarnermik inuussutissarsiuteqarsinnaanissaminnik Nunatsinnisut ajornartorsiuteqarput, pisassiissutinilli qulinik makitsisoqarneratigut aalisartut inuusuttut qulit maanna ikiorneqarput.

Allattoq Mads Lynge, Camilla Dam

novembarip 17-at 2014 15:06

Makitsinikkullu pisassinneqartut tamanna iluaqutigilluinnarsinnaavaat:

- Periarfissatsialammik tunineqarpugut. Allaanngilaq lottomi eqquiinnallarluni. Umiatsiannut naleqquttumik saarullittassanik pisissasuugaluaruma 535.000-it 625.000-it koruunillu akornanni akeqassagaluarpoq, Kim-Are Botolfsenip, aviisit ilaannut Lofotpostenimut oqaatigaa.

Aamma atuaruk Inuusuttut amerlanerusut aalisalernissaat aqqutissiuunneqartoq

Assersuutigalugu saarullittassinneqarniaraanni 30-liisimannginnissaq piumasaqaataavoq, aalisariuteqartariaqassaaq, pisassiissutinillu qinnuteqarniaraanni aalisarnermi 178.000-it koruunit nalinginik ukiup kingulliup ingerlanerani isertitaqarsimasussaalluni.

Kim-Are Botolfsen 26-nik ukioqarpoq, aalisaritilimmilu maannamut sulisimalluni. Nammineq aamma umiatsiaateqarpoq, qinnuteqaateqartullu akuerisaasimasut 28-t akornanniilluni.

Norgemi pisassiissutit pillugit 2009-mili ukiumut makitsisoqartarsimavoq.