Nunani avannarlerni ilinniarnertuunngorniarfeqalissasoq
Taama oqaluttuarpoq GUX Sisimiuni rektori tamatumunngalu suliniuteqartoq Poul Jensen.
Nunat assigiinngitsut ilinniariarfiusussat ilinniartunut iluamik misigisaqarfigilluarneqarnissaat kissaatigineqartarmat suliniut aallartissimanerarpaa.
Nunat atuarfiusut ilisimasaqarluarfigilernissaannut periarfissanngussaaq, tamannalu inuiaqatigiinut peqataalluarnikkut pinngortitamik kulturiannillu misigisaqarfiulluarsinnaalluni.
AAMMA ATUARUK Ilinniarnertuunngorniat kattuffiat nunarput pillugu Danmarkimi atuartunut paasititsiniaaniartoq
Nunat avannarliit ilinniarnertuunngorniarfiat tallimanik arfinilinnilluunniit nunanit sisamaneersunit ilinniartuuteqartassapput. Ilinnialerumallutik qinnuteqartunut piumasaqaataasussat suli aalajangerneqanngillat, inississugassat allat suli suliarineqarmata.
- Oqaatsit pikkoriffigineqartariaqarput. Angalarusussuseqarluartariaqarlunilu, angerlarsimaffillu qimallugu allami najugaqarnissamut piumassuseqartariaqarluni.
Ukiut pingasut ingerlanerini ilinniartut ukioq ataaseq Gribskov Gymnasiaani atuassapput, ukiup aaffaa Savalimmiuni Miðnám á Kambsdalimi, ukiup affaa Islandimi Verzlunarskoli Islandimi ukiorlu kingulleq GUX Sisimiuni atuassallutik.
AAMMA ATUARUK Danmarkimi ilinniarnertuunngorniat suliniut INUA tapersersussavaat
Nunat taakku sisamat akornanni angallattoqarluarsinnaaneranut aaqqissugaq ersiutaassasoq, Poul Jensen isumaqarpoq.
- Ilinniarnertuunngorniarfimmik sumiiffimmi ataasiinnarmiittussamik pilersitsiniartoqanngilaq, uanilu nunat avannarliit akornanni angalalluartarnerannut takussutissaalluarluni.
Ilinniartut ilinniarnerminni namminneq oqaatsitik atorlugit nunagisaminniinngikkunik qaraasaasiaq aqqutigalugu aamma ilinniartinneqassapput. Ilinniarnertuunngorniarfittaasssaq Danmarkimit ilinniartitaanermut ministeriaqarfimmit akuersissutigineqareerpoq, nunatsinnili ilinniartitaanermut naalakkersuisoqarfimmit suli akuersissutigineqarani.
