Danmarkimi ilinniarnertuunngorniat suliniut INUA tapersersussavaat
Danmarkimi tamarmi ilinniarnertuunngorniat novembarimi ulloq ataaseq atuanngiffeqarlutik sulillutik akissarsiaat nunarsuarmi tamarmi suliniutinut aningaasaliissutaasarput.
Aningaasat ukiut tamaasa inuusuttut ilinniagaasa ineriartortinnerinut atorneqartarput, ukioq mannalu tapiissutit Kalaallit Røde Korsiannut aamma Danmarkimi Ungdommens Røde Korsimut ingerlatinneqassapput, eqqornerusumik oqaatigalugu suliniummut INUA-mut, Sina Parbst Frederiksen taama oqarpoq.
- Sinerissami namminneq piumassutsiminnik sulisussat inooqataaneq pillugu sulisussatut ilinniartinneqassasut, taanna oqarpoq.
AAMMA ATUARUK Operation Dagsværk kalaallit inuusuttaannut aningaasanik nassiussiniartoq
Namminneq piumassutsiminnik sulisut inuusoqatitik sinerissamiittut sumiiffimminni ulluinnarni kissaatitik piviusunngortsissinnaanngorlugit siunnersortassavaat.
- Assersuutigalugu kalaallit inuusuttorpassuit nipilersortarput. Imaassinnaavorlu ilaat unnuit ilaanni Kulturikkut illorsuarmi Katuami Nuummiittumi nipilersornissamik aaqqissuussisinnaasut.
Suliniummi inuusuttunik ilinniartitsinissaq siunertarineqarpoq, assersuutigalugu kissaatigisanut aningaasassarsiorsinnaanermut.
AAMMA ATUARUK KRK-INUA Nuummi workshoppertitsinikkut nalilersuititsisoq
Taamaaliorneq inuusuttut imminnut tatiginerannik iluaqusiisinnaasoq, Sina Parbst Frederiksen oqarpoq.
- Nammineersinnaavugut. Sumiiffitsinni allanngueqataasinnaavugut.
"Operation Dagsværk"imi danskit ilinniarnertuunngorniat 2016-imi koruunit 4,3 millionit katersorpaat, taakkulu Guatemalami suliniutinut tutsinneqarput.
"Operation Dagsværk" tikitsinnagu danskit piumassutsiminnik sulisut Kalaallit Nunaat pillugu atuaqatiminnut paasissutissanik ilinniusiussapput.
AAMMA ATUARUK Ilinniarnertuunngorniat kattuffiat nunarput pillugu Danmarkimi atuartunut paasititsiniaaniartoq
Inuusuttut Røde Korsianneersut "Operation Dagsværk" imeersullu maanna Nunatsinni inuusuttunik oqaloqateqartarlutik paasiniarpaat inuusuttut Kalaallit Nunaanneersut danskinut inuusuttunut suut anngutissallugit pingaartinneraat.