Niviaq Korneliussen Nunat Avannarliit atuakkiortunut nersornaasiuttagaannut innersuunneqartoq
Atuakkiortoq, Niviaq Korneliussen piffissami matumani innersuunneqallattaarpoq.
Taassuma atuakkiaa ’Naasuliardarpi’ Danmarkimi atuakkiortunut nernaasiinissanut angisuunut marlunnut tassa Politikenip aamma Montanap atuakkiortunut nersornaasiuttagaannut januaarimi innersuunneqarpoq.
Tamatuma kingorna Kritikerprisenimut innersuunneqarpoq, atuakkiortorlu nersornaasiinernut annerungaatsiartut ilaannut ullumikkut innersuunneqarpoq. Niviaq Korneliussenimi Nunat Avannarliit Siunnersuisoqatigiivisa atuakkiortunut nersornaasiuttagaannut 2021-mi ajugaasussatut innersuunneqarpoq.
Nunat Avannarliit Siuinnersuisoqatigiivi tusagassiuutinut nalunaarummi taama paasissutissiipput.
2015-imi aamma innersuunneqartoq
Niviaq Korneliussenip atuakkiaata nunanit avannarlernit oqaluttualiat, naatsukullaliat taallallu katersukkat allat 13-it unammissavai.
- Ukioq manna innersuussinermi Nunani Avannarlerni nunanit tamanit oqaatsinillu assigiinngitsunit tamanit suliat innersuunneqarput. Oqaluttualianut taallianullu tunngasuupput, aamma atuakkiortunik innersuunneqareersimasunik ilaqarput, Nunat Avannarliit Siuinnersuisoqatigiivi tusagassiuutinut nalunaarummi allapput.
AAMMA ATUARUK Atuakkiortut peqatigiiffiata nutaaliortumut Niviaq Korneliussenimut innersuussinerit nersualaarutigai
Niviaq Korneliussen innersuunneqareersimasut ilagaat. Taassumami atuakkiaqqaataa ’Homo Sapienne’ Nunat Avannarliit Siunnersuisoqatigiivinut 2015-imi innersuunnerpoq. Nunat Avannarliit Siunnersuisoqatigiivisali ajugaasumik tamanut saqqummiussinissaannut suli piffissaq sivisulaarpoq. Tamanna Københavnimi novembarip ulluisa aappaanni aatsaat pissaaq. Niviaq Korneliussenip innersuunneqarfiini allani pingasuni ajugaasoq marsip aallartinnerani saqqummiunneqartussaavoq.
- Nunat Avannarliit Siunnersuisoqatigiivinit nersornaaserneqarsimasut:
- 2020: Monika Fagerholm, Finland: "Vem dödade bambi?"
- 2019: Jonas Eika, Danmark: ”Efter Solen”
- 2018: Auður Ava Ólafsdóttir, Island: "Ör"
- 2017: Kirsten Thorup, Danmark: "Erindring om kærligheden"
- 2016: Katarina Frostenson, Sverige: "Sånger och formler"
Nunat Avannarliit Siunnersuisoqatigiivi 1962-imili Atuakkiortunut nersornaasiisalerput.
