Nivi Olsen: Sinneqartoorutillit tapiissutisisassanngillat

Tapiissutinik qinnuteqarniaraanni arlalinnik eqquutsitassanik piumasaqaatitaqarmat, suliamiillu suliamut aaliangerneqartassallutik, tusagassiuutit isornartorsiuisut tapiissutinik tunineqanngitsoorsinnaaneri ernumassutigineqarpoq, taamaattoq tusagassiuutit imminnut nakkutiginerulernissaat ilimagineqarluni.

Ernumassuteqartoqartariaqanngitsorli kultureqarnermut naalakkersuisoq Nivi Olsen isumaqarpoq, tusagassiuutillu imminnut nakkutiginerulissagaluarpata akisussaaffik tigujumaarlugu oqarluni.

- Uanga naalakkersuisutut qinnuteqartut sooq tapiissutisimanersut oqaluttuutissallugit naggaterpiaani akisussaaffigivara. Imannak oqartoqaraluarpat Demokraatinut, naalakkersuisunut arlaannulluunniit tusagassiortut uparuaasimappata, tamannalu pissutigalugu uanga nuannarinnginnakkit tapiissutinik tunisimanngikkikka, taava uanga niaqora naggaterpiaani assakaajumaarpoq. Taamaattumik annilaangassutissaqartoqanngilaq, Nivi Olsen oqarpoq.

Pitsaassuseq sunnernerlunneqassaaq

Tusagassiuutinut tapiissutinut aaqqissuussaq nutaaq atuutilerpat, Sermitsiaq.AG aningaasanik annaasaqarnissartik ilimagaat.

Sermitsiaq.AG-mullu tamanna kingunerlussinnaasoq, Sermitsiaq.AG-p pisortaanera, Poul Krarup oqarpoq.

- Sulinerusariaqassaagut tusagassiortugullu ikinnerulissallutik. Tamanna naammaginanngilaq. Aningaasanik annaasaqarnitsigut suliatta pitsaassusai sunnerneqassapput, Poul Krarup oqarpoq.

Pisortap taama oqarnera kultureqarnermut naalakkersuisup, Nivi Olsenip isumaqatiginngilaa oqarluni KNR-p ussassaarisinnaajunnaartussaanera pissutigalugu, Sermitsiaq.AG ussassaarinikkut aningaasarsiornerulersinnaassasoq. Tamanna pillugu Nivi Olsen ima oqarpoq.

- Aningaasarsiorfissaminnik periarfissamik angisoorujussuarmik massakkut pinnapput, Nivi Olsen oqarpoq.

Poul Krarupili taamaassorinngilaa.

Sermitsiaq.AG-p ussassaarutitigut isertitarisinnaasai, tusagassiuutinut tapiissutitigut isertitarisartakkanit ikinnerunissai, Poul Krarupip ilimagaa.

Nivi Olsenili tamassumunnga isumaqataanngilaq erseqqissarlugulu, tusagassiorfik Sermitsiaq.AG ukiuni arlaqartuni kingullerni sinneqartoorsimanera eqqaamasariaqarnerarlugu.

Tassa ilaatigut tamanna pillugu aviisip tapiissutisisarnissaa, Naalakkersuisup tulluartuusorinagu.