Tusagassiuutit imminnut nakkutiginerulernissaat ernumassutigineqarpoq

- Tusagassiuutit pillugit Kalaallit Nunaat iluameersumik politikkeqalernissaa pissusissamisoorpoq. Tamat oqartussaaqataanerat siunissami isumannaassagutsigu tusagassiuutinik attuumassuteqanngitsunik, apeqqutinik eqqortunik aperisinnaasunik misissuisinnaasunillu atorfissaqartitsivugut, Poul Krarup oqarpoq.

Tusagassiuutit nutaat sapernannginnerusumik tapiissutisinissaat, aaqqissuinerup nutaap ilaatigut siunertarigaa Nivi Olsen oqarpoq.

Inuit Ataqatigiit politikkikkut oqaaseqartartuata Naaja Nathanielsenip aaqqissuussaq taama sunniuteqarnissaa qularivaa.

- Tapiissutinik qinnuteqarsinnaasut amerlinissaat ajunngitsorujussuuvoq. Tapiissutilli sulianut ataasiakkaanut kisimi qinnutigineqarsinnaapput. Taamaammat tusagassiuutinut tapiissutit uani pitsanngorsarneqanngilaq, Naaja Nathanielsen oqarpoq.

Poul Krarupilu isumaqataavoq.

- Tusagassiuutit allat tapiissutisinissaminnut soorunami periarfissaqassapput. Aningaasalli pineqartut 150.000 koruuniusut 500.000 koruuniusulluunniit tusagassiuutinik  pilersitsisinnaanissamut ikippallaarput, Poul Krarup oqarpoq.

Tusagassiuutillu ernumassutigineqarput.

- Tusagassiuutit ukiut tulliuttuni ikilissasut uuma sunniutigissavaa, aamma tusagassiuutit minnerit takkuteriarlutik tammartassapput. Tusagassiuutit imminnut nakkutigilernerulernissaat ilimagaara. Aningaasatigut sunnerneqapilussinnaagunik tusagassiortut sooruna isornartorsiuissappat? - Naaja Nathanielsen aperivoq.

Poul Krarupip tamanna aamma ernumassutigaa, Sovjet Unionimilu partiit aviisiat Pravdamut naleqqiussivoq.

- Tamat oqartussaaqataanerannik anguniagaqarneq  Kalaallit Nunaanni mikisuararsuuvoq. Pravdatulli tamat oqartussaaqataanerat kissaatigineqarpoq. Tassani ataasiinnarmik ilumoortoqarpoq, tassaasoq paasissutissiisarfittut immikkoortortaqarfiata ilumoortutut taakkartugaa, Poul Krarup oqarpoq.

Tusagassiorfik Sermitsiaq.AG soraarsitsisariaqarsinnaassasoq, sulisuilu sinneruttut sulinerusariaqalissasut, Poul Krarupip aamma oqaatigaa.