Nivi Olsen: Eskimologip attatiinnarneqarnera nuannaarutigaara
- Soorunami oqiliallaatigalugulu nuannaarutigisorujussuuvara ilinniagaq ammatiinnarnissaa periarfissinneqarmat. Maani kalaallinut nunaqartunut eskimologimut soqutiginnittunut, soorunalimi aamma nuna tamaat isigalugu, issittormiut nunaat soqutigineqaraluttuinnarnerat malillugu nuannaarutigaara periarfissaq taanna ammatiinnarneqarmat, ilinniartitaanermut naalakkersuisoq, Demokraatineersoq Nivi Olsen, KNR-imut oqarpoq.
Issittumi, issittumilu periarfissat, maanna ukkatarilerneqarneranni eskimologi attatiinnarneqarnissaa pingaaruteqarluinnartuusoq, naalakkersuisup erseqqissaatigaa.
Aamma atuaruk Hans Enoksenip eskimologi attatiinnarneqalernera ilorrisimaaraa
Ilisimatusarnermi sammisaq matuneqarnavianngikkaluartoq ilinniartunik nutaanik aatsaat aappaagu aallartittoqaqqissaaq, tamannali naalakkersuisup iliuuseqarfigisinnaanngilaa.
-Soorunalimi Danmarkimi ilinniagaqarfiit qanoq imaqassanersut sunalu ilinniartissaneraat uanga naalakkersuisutut pisussaaffiginngilara, Nivi Olsen oqarpoq.
Folketingimut Inuit Ataqatigiit sinnerlugit ilaasortap, Aaja Chemnitz Larsenip aamma eskimologip attatiinnarneqarnissaa nuannaarutigilluinnarpaa, ukioq mannali nutaanik ilinniartoqalinnginnera ippigaa.
Aamma atuaruk Københavnip Universitetiata eskimologi ingerlatiinnassavaa
-Isornartorsiuinerup tusarnaarneqarsimannginnera uggoraara, 2016-imilu aasaanerani ilinniartunik nutaanik aallatittoqannginnissaa ajuusaarnarpoq, Aaja Chemnitz Larsen oqarpoq.
Ukiut tamaasa nutaanik ilinniartoqalertassanngippat, ilinniarnerup pitsaassusaata innarlerneqarnissaa Aaja Chemnitz Larsenip ernumagaa.
-Siunissami qanoq ingerlanniarneqarnersoq naluara, kisianni ukioq allortarlugu nutaanik ilinnialertoqartarnissaa eqqarssaatigineqarpat, ilinniartoqatigiinnut iliniakkallu pitsaassusaanut soorunami sunniuteqassaaq, Folketingimut ilaasortaq, Aaja Chemnitz Larsen oqarpoq.
