Nivi Olsen: Demokraatit suna tamaat akigalugu Siumut tapersersornavianngilaa
Suna tamaat akiginianngilaat, piffissaanngitsumili qinersisoqartikkusunnagu. Siumumi eqqissiviilliortoqarnera pissutaalluni Demokraatini siulittaasuugallartup Nivi Olsenip Demokraatinit Inatsisartuni siulersuisunilu ilaasortat ataatsimiinnissamut aggersarpai.
- Suna tamaat akigalugu imaluunniit isiginngitsuusaarlugu tapersersortaanissaq taanna orniginanngitsorujussuuvoq, Nivi Olsen Inuiaat tillernerannut taama oqarpoq.
AAMMA ATUARUK Henrik Fleischer Siumumit tunuartitaasinnaanerminut: Paatsooqatigiittoqarpoq
Naalakkersuisooqatigiinnut ikinnerussuteqartunut Demokraatit tapersersortaapput. Siumukkulli suna tamaat akigalugu tassa tapersersorunnanngikkitit Demokraatit siulittaasorigallagaata Nivi Olsenip oqaatigaa.
- Inatsisartut aalisarnermut ataatsimiititaliaata aalisarnermut naalakkersuisoq Jens Immanuelsen (S) tatigiunnaarlugu tusagassiuutinut pingasunngornermi februaarip 19-iani nalunaarutigaat.
- Henrik Fleischer (S) aalisarnermut ataatsimiititaliami siulittaasuuvoq.
- Henrik Fleischer Siumumit ilaasortaajunnaartitaasoq Sermitsiaq.AG-p sapaatip akunnerata naanerani allaaseraa. Allaaserisami tusarfiit kinaassusaat isertuunneqarput.
- Pisoq paatsooqatigiinnerusoq henrik Fleischerip KNR-imut oqaatigaa. Partiimiillu anisitaasimanerluni ilaasortaaginnarnerluniluunniit naluaa.
- Siumut qullersaanit KNR-imit oqaaseqartitsiniarsarigaluarpugut. Siumumi siulittaasup tullia Karl Kristian Kruse oqaaseqartussaagaluartoq saaffiginnissutinut akiumanngilaq.
- Siumup siulittaasuata Kim Kielsenip ulluinnarnilu aqutsisuni ilaasortap Vivian Motzfeldtip Karl Kristian Kruse oqaaseqartussaanerarpaat.
Henrik Fleischer Siumumit ilaasortaajunnaartitaasimasinnaanera Demokraatit siulittaasorigallagaat taama qisuariaateqarpoq.
Henrik Fleischer Siumumi ilaasortaajunnaarsimasoq Inatsisartut siulittaasoqarfiatallakkatigut paasitinneqarsimasut Sermitsiaq.AG-p arfinninngormat allaaseraa.
Taama pisoqarsimanersoq uppernarsarniarlugu Siumumi siulittaasup tullia Karl Kristian Kruse KNR-imit pissarsiariniarsarigaluarparput iluatsinngitsumilli.
Pisoq pillugu Demokraatit ataatsimoorlutik nalilersuinissaaq pingaaruteqartoq siulittaasuugallartoq oqarpoq.
- Taannalu eqqarsaatigalugu siulersuisunut Inatsisartunullu ilaasortanut aggersaanikuuvunga. Issiaqatigiilluta eqqartueqatigiittussaavugut nalilersuinissaq eqqarsaatigalugu, Nivi Olsen oqarpoq, taassumali ataatsimiinneq qanoq kinguneqarumaarnersoq oqaatigisinnaanngikkallarnerarpaa.
AAMMA ATUARUK Kim Kielsen tapersersorparput - kisianni imaanngilaq Siumut killeqanngitsumik tapersersoripput
Piffissaanngitsumili qinersisoqarnissaa Nivi Olsenip orniginartinnagu aamma oqaatigaa, politikkikkut suliat taamaattoqartillugu unittoortarmata.
Demokraatit ataatsimeereerpata paasinarsissasoq
Siumukkunnullu tapersersortaajunnaassagunik annertoorujummik pisoqartariaqarnerarpaa. Siumumilu ilaasortap ataatsip ilaasortaajunnaartinneqarnera annertuutut taasassaannginnerarlugu.
Namminerli tamanna isumagigini naqissuserpaa, Demokraatinilu ataatsimiilerunik qanoq inerniliiumaarnerlutik paasinarsissanerarpaa.
- Nalunarpoq qanoq kinguneqassanersoq taamatut nalilersuinissaq.
Siumumi eqqissiviilliorneq pillugu Karl Kristian Kruse oqaaseqassasoq innersuunneqarpoq. Siumumili siulittaasup tullia ualeq tamaat pissarsiariniarsarigaluarparput iluatsinngitsumilli.
