Demokraatit: Kim Kielsen tapersersorparput - kisianni imaanngilaq Siumut killeqanngitsumik tapersersoripput
Demokraatit Naalakkersuisut siulittaasuat Kim Kielsen suli tapersersorpaat, Siumulli nutaamik siulittaasoqalissappat Demokraatit nalornissutiginngilluinnarpaat nutaamik isumaqatiginniniarnissartik.
Demokraatini siulittaasuugallartoq Nivi Olsen taama oqarpoq.
-Siumut allamik siulittaasortaassagaluarpat isumaqatiginninniarnerit nutaat ingerlatissallugit naatsorsuutigilluinnaqqissaarparput. Tassanilu takutikkumaarpaa qanoq ingerlariaqqittoqassanersoq.
Qisuariarnissaminnut piareersimasut
Demokraatilli Kim Kielsen suli tapersersoraat Nivi Olsen erseqqissaavoq.
- Oqaluttuarisaanermi aatsaat taama angitigisut alloriarfigilerigut assorujussuaq ugguarpunga Siumut partiimi taamatut avissaartuuttoqarmat. Kisianni aamma tupinnarpallaanngilaq tassami alloriarnermut annertuumut allorialernitsinnut ersiutaammat. taamaattumik Kimmi tapersersorparput.
Kim Kielsen Naalakkersuisut siulittaasuattut tunuassagaluarpat, Demokraatit suna tamaat akigalugu tapersersuinissartik naatsorsuutiginngilaat.
- Kisianni oqartoqassanngilaq suna tamaat akigalugu tapersersuinissarput. Partiitut nammineq kinaassuseqarpugut, taamaattumik taanna arlaatigut isumaqatigiissutigullu uniuutsinniarneqalissappata qisuariassaqqaarpugut.