Nioqqutissat peqqinnanngitsut niuertarfinni siorna pisiarineqarnerpaapput, niuernialli sunik pisiniartarpat?

Sodavandit, imigassat aalakoornartortallit sikaritsillu niuerniartarfinni siorna pisiarineqarnerpaasut Paarisap nalunaarusiaani allaqqavoq. Nioqqutissallu peqqinnartut pisiarineqarsimasunut allattorsimaffimmi appasinnerusumiipput. Allattorsimaffik qimerlooraanni nerisassat peqqinnanngitsut soorlu chipsit, nerisassat kissattariaannaat iffiaq qaqortullu pisiarineqarnerpaat ilaanniipput.

Inuilli niuerniaraangamik suna salliutittarpaat? Aamma peqqinnanngitsut allattorsimaffimmi pisiarineqarnerpaasimasut paasigamikku qanoq eqqarsarpat?

Tamakkua paaserusullugit KNR-imiit apersuiartorluta Nuummi Pisiffimmukarpugut.

Assi © : Lærke Schmidt Fallesen

Kathrine Juul Hachenberger, 37-inik ukiulik. Nuummi najugaqarpoq politiiullunilu. 

Ullumikkut susiniarniarpit?

- Ullumikkut kaagiliussalluta aalajangiukkatsigu. Ernerput nukarleq manninik immunnillu sapigaqarmat uumasuneersunik akoqanngivittunik kaagiliorniarpugut. Aamma ileqqoraarput nerisassanik maanngaannartitsinnginnissaq. Paarnanik naatitanillu neqerooruteqarnersoq misissullattaartuarparput.

Pisiniaraangavit suut pisiarerusunnerusarpigit?

- Danmarkimi najugaqarallaratta akuutissartaqanngitsuinnavinnik pisisarpugut. Tamaat isigalugu maani akit pisiassallu nutaajusuaannanngillat, taamaattumik akuutissaqanngitsunik pisiassaqaraangat akiminnullu naleqquppata pisiarisarpagut.

- Taamaanngippallu nutaaniik ineritiataqartarpoq naatitaqartarlunilu, taava taakku pisiarisarpagut.

Pisiniaraangavit pisiatit peqqinnartuunersut imaluunniit peqqinnanngitsuunersut eqqarsaatigisarpigit?

- Aap, eqqarsaatigingaatsiartarpara, nerisassat pisiariniakkama vitamineqarluarnissaat nukissaqartitsisinnaalluarnissaallu pingaartippakka. Piareeriikkat qaqutigorujussuarmik pisiarisarpagut.

Una allattorsimaffik takugakku qanoq eqqarsarpit?

- Pisiariniakkatsinnut naleqqutinngitsorujussuuvoq, imigassamik aalakoornartutalimmik pisineq ajorpugut. Taamaallaat rødviinnimik pitsaasumik akuttusuumik pisisinnaasarpugut. Aamma sikaritsisinngisaannarpugut. Maani sodavand akisoorujussuummat pitsaalluinnartunik neqerooruteqanngippat sodavandisineq ajorpugut. Iffiaq qaqortoq soqutigivallaanngilarput, namminerli iffiortarpugut.

Assi © : Lærke Schmidt Fallesen

Lis Steenholdt, 64-inik ukioqarpoq. Nuummi najugaqarpoq, Air Greenlandimilu pilersaarusiortartuulluni.

Pisiniaraangavit suut pisiarerusunnerusarpigit? 

- Nerisassat peqqinnartut, naatitat taavalu assigiingitsut sukkoqanngitsut toqqartarpakka ukiut pingasunngorakkit. Tamakku peqqinnerusumik inuuneqarniarlunga inuuninniit piiarnikuuakka.

Pisiniaraangavit eqqarsaatigisarpigit pisiatit peqqinnartuunersut imaluunniit peqqinnanngitsuunersut?

- Aap, naatitat neqillu nunatsinninngaanneersut. Taava soorunami makkua neqeroorutaasut aamma misissortuaannaavippakka, pisiassat ukioq kingulleq assut akitsoriartuinnaavissut malunnaramik.

Una allattorsimaffik takugakku qanoq eqqarsarpit?

- Tupinnaqaaq.

Assi © : Lærke Schmidt Fallesen

Silverio Scivoli, 76-inik ukiulik. Ilulissani najugaqarpoq, takornariartitsisuusarsimasoq.

Ullumikkut susiniarniarpit?

- Ullumikkut nerisassarsiniarpugut. Naatitanik inerititanillu pisinerusarpugut. Inerititat naatitallu suliarineqarluarsimanngitsut akulikitsumik asiusimasarput, kisianni pitsaanerit toqqartuaannarpagut.

Pisiniaraangavit suut pisiarerusunnerusarpingit? 

- Ulloq atorunnaarfissaat pitsaassusaallu eqqumaffiginiarnerusarpagut. 

Pisiniaraangavit eqqarsaatigisarpigit pisiatit peqqinnartuunersut imaluunniit peqqinnanngitsuunersut?

- Suulluunniit peqqinnartut nalinginnaasumik eqqarsaatiginerusarpagut. Assersuutigalugu naatitat inerititallu. Neqimik siatassamik, suppaliassanik assigiingitsunillu ilaannikkut pisisarpugut. Suulluunniit peqqinnartut uagutsinnut pingaaruteqarput.

Una allattorsimaffik takugakku qanoq eqqarsarpit?

- Imigassaq, immiaararlu uagutsinnut soqutiginaateqanngillat. Imaluunniit sikaritsit. Soorunami peqqinnanngitsorpassuarnik pisiassaqarpoq, kisianni amerlanerpaartaat pisiarineq ajorpagut.

Assi © : Lærke Schmidt Fallesen

Veronica Olsen, 30-inik ukiulik. Nuummi najugalik akileraartarneq akitsuutillu pillugit siunnersortit, Cafe Iggumilu pajuttuisartoq.

Ullumikkut susiniarniarpit?

- Nerisassat, ulloqeqqasiutissatsinnik pisiniarpugut.

Pisiniaraangavit suut pisiarerusunnerusarpingit? 

- Nioqqutissat akikinnerit, nerisassat taava energidrikinik ilaannikkut pisisarpunga kisianni nerisassaanerusarput pisiarisartakkakka.

Pisiniaraangavit eqqarsaatigisarpigit pisiatit peqqinnartuunersut imaluunniit peqqinnanngitsuunersut?

- Pisiniaraangama eqqarsaatigisarpara susilernerlunga, mamarisakka pisiarinerusarpakka.

Una allattorsimaffik takugakku qanoq eqqarsarpit?

- Immaqa naliginnaapajaarpoq tamakkuninnga pisiortorneq, inuit sodavanditornermik.