Ningittagarsuut Sisimiut eqqaani tunitsivittut atuutilertoq

Sisimiuni Sarfannguanilu aalisartut saarullinnik tunitsiveqarniarnerat pitsaanerulersinniarlugu ningittagarsuut Masilik Sisimiut eqqaani tunitsivittut atuutilerpoq. Royal Greenlandip nittartagaani tamanna allaaserineqarpoq.

Ningittagarsuut Ice Trawl Greenland A/S-imit pigineqartoq aalisakkat maannamut annerpaamik ullormut 33 tonsit qeritillugit tunisassiarisarpai. Masilik Sisimiut eqqaani tunitsivittut qaammat ataasiugallartoq atuutissaaq.

- Masilik Sisimiut eqqaani maajip 22-ani tunitsivittut atuutilerpoq, taamatullu atuukkallassaaq tunitsivittut atuunnerata akilersinnaassusia naapertorlugu. Aalisakkat qaffasissumik pitsaassusillit qeritillugit naleqquttumik akeqartillugit tunisinnaanissaat anguniarneqarpoq, Ice Trawl Greenland A/S-imi siulersuisuni siulittaasoq Ove Rosing Olsen taama oqarpoq.

Aalisakkat Masilimmut tunisat niaqui umiarsuarmi piaarneqariarlutik qeritinneqartarput. Masilik 18-inik inuttaqartoq, Royal Greenlandip nittartagaani, royalgreenland.gl-imi tamanna atuarneqarsinnaavoq.