Nikisiterineq: Nunatta nunarsuarmi nipaanut kiinnat nutaat

Nunanut allanut naalakkersuisoq, Vivian Motzfeldt nunatta sinniisoqarfiini siuttunik nikisiterivoq.

Naalakkersuisut tusagassiuutinut nalunaarummi allapput.

- Suliassaqarfinnut nukittuunik sulisussaqaratta tanngassimaarutigaara, taakkulu pikkorilluinnarlutik akuutitsillutillu Kalaallit Nunaata soqutigisaannik Kalaallit Nunaannut sinniisorissavavut, Vivian Motzfeldt tusagassiuutinut nalunaarummi oqarpoq, nunattalu nunanit tamalaanit ukkatarineqarnerata pingaassusaa erseqqissaatigalugu.

- Ilutigaluguttaaq nuannaarutigalugu oqaatigissavara angerlartitsinitsigut Issittumi Siunnersuisooqatigiinni siulittaasuuffeqarnitsinni sulinissamut nukittorsaasinnaagatta, Vivian Motzfeldt tusagassiuutinut nalunaarummi oqarpoq.

Inissisimaffinni nikititerineq

Jacob Isbosethsen Washington D.C.-mi sinniisoqarfimmi pisortassatut juulip aallaqqaataanit inissinneqassaaq, taanna Beijingimi sinniisoqarfimmi pisortatut maannamut inissisimavoq.

Taassuma atorfigiligaa Kenneth Høeghimit qaammatip siualini Kunngeqarfik Danmarkimi issittoq pillugu aallartitanngortinneqartumit maannamut atuuffigineqarsimavoq.

Tove Søvndahl Gant Bruxellesimi sinniisoqarfimmi septemberip aallaqqaataanit pisortanngussaaq. Taanna Reykjavikimi sinniisoqarfimmi pisortatut maannamut inissisimavoq. Taanna Karsten Peter Jensenimit atorfigineqalissaaq. Taannalu Nuummi nunanut allanut naalakkersuisoqarfimmi siunnersortaanertut atorfeqarsimalluni.

Inuuteq Holm Olsen Bruxellesimi sinniisoqarfimmi pisortatut inissisimasoq juulip 31-ani angerlartinneqassaaq, tamatumalu kingorna Issittumi Siunnersuisooqatigiit siulittaasoqarfianni suleqataassalluni.

Beijingimi atorfik inuttassarsiuunneqassaaq ukioq mannalu kingusinnerusukkut inuttalerneqassalluni.