Nick Nielsenip EU-mut qanillattorniarnera Doris Jakobsenip tupigusuutigigaa
- Siumut qaammatit sisamat matuma siorna juunimi ataatsimeersuarpoq. Politikkikkut anguniagassat nutaat aalajangersarneqarput, EU-mulli ilaasortanngornissaq ataatsimilluunniit qaqinneqanngilaq eqqaaneqaraniluunniit, aamma Nick Nielsenimit ataatsimeersuarnermi qaqinneqanngilaq, Doris Jakobsenip Nick Nielsenip siulittaasussatut sassarnermini saqqummiussaanut oqaaseqaateqarluni taama allappoq.
- Aningaasaqarnikkut ajornartorsiornitta tappiillisissanngilaatigut, EU-mut ilaasortanngornissaq isumassarsiatsialaanngilaq. EU pisuussutitsinnut akisussaaffimmik tunissallugu akissaqanngilagut, Doris Jakobsen erseqqissaavoq.
AAMMA ATUARUK Nick Nielsenip Siumumi siulittaasunngornissaanut tapersiisut
Peqatigitillugu Nick Nielsen isumaqatigaa nunarput nunanik allanik suleqateqartariaqartoq, aammalu danskit aningaasaliisartut Nunatsinni aningaasaliinissaannut periarfissinneqartariaqartut.
EU-mulli ilaasortanngortoqassava? Naagga!
- Nick Nielsen isumaqaruni EU-mut ilaasortanngornissaq pisariaqarluinnartoq, taava kaammattorusuppara Siumut tulliani ataatsimeersualerpat, ukiut pingasut qaangiuppata, qulequtaq taanna qaqeqqequllugu, Doris Jakobsenip Nick Nielsenip saqqummiussaanut oqaaseqaatini taama naggaserpaa.
AAMMA ATUARUK Ilisimasalik: Siumumi siulittaasunngorniunnermi sassartut ilaat immikkut allaanerussuteqarpoq