VIDEO Ilisimasalik: Siumumi siulittaasunngorniunnermi sassartut ilaat immikkut allaanerussuteqarpoq

Aleqa Hammondip pisortat aningaasaataannik atornerluisimanini pissutigalugu siulittaasuujunnaarnerata kingorna, Siumup qineqqusaarnera ingerlariaqqinnissaalu kimit siuttuuffigineqassanersoq Sten Lundip takorlooruminartippaa.
Allattoq Camilla Dam, Arnaq Nielsen, Simon Uldum -
oktobarip 15-at 2014 11:19

- Maannakkutut inissisimasoqartillugu Kim Kielsen Siumumi piukkunnarnerpaajusutut oqaatigineqarsinnaavoq. Kina tutsuiginartinneqarnerpaassanersoq paasinarsissaaq.
 
- Siuttussamik tatiginartumik aalajaatsumillu piffissami sivisuumi atasinnaasumik pisariaqartitsisoqarpoq, Sten Lund KNR-imut taama oqarpoq.


Jakobsen, Kielsen Nielsenilu
Siumumi siulittaasussamik toqqaasoqarnissaanut ullut pingasuinnanngorput, siulittaasussatullu sassartut maannamut pingasuupput.

 

Doris Jakobsen Iluliarmiuuvoq, 35-nik ukioqarluni Inatsisartunullu 2002-mi qinigaangami ilinniartitsisutut ilinniagaqarnini kipisariaqarsimavaa taamaattumillu ilinniakkamik naammassisaqarsimanani. Hans Enoksenip 2005-2006-imi naalakkersuisuutitaani kultureqarnermut, ilisimatusarnermut ilageeqarnermullu naalakkersuisuuvoq. 2011-milu Folketingimut qinigaavoq.
 
Kim Kielsen 47-nik ukioqartoq Paamiormiuuvoq politiitullu ilinniagaqarluni. 2005-imiilli naalakkersuinermik suliaqalerpoq, Hans Enoksenillu naalakkersuisuutitaani 2007-mi ineqarnermut, attaveqarnermut aatsitassanullu naalakkersuisunngortinneqarluni. Partii Inuit naalakkersuisooqatigiinnit siorna tunuarmat, pinngortitamut avatangiisinullu naalakkersuisunngorpoq.
 
Siulittaasunngorniunnermullu kingulliulluni ilannguttoq tassaavoq Nick Nielsen, civilingeniøri 39-nik ukioqartoq Qasigiannguaneersorlu. Taanna naalakkersuinikkut suliaqarnermi nutaraavoq, Aleqa Hammondillu naalakkersuisuutitaani ilinniartitaanermut, kultureqarnermut, ilageeqarnermut naligiissitaanermullu naalakkersuisutut ivertinneqarluni.
 
Partiimilu anorersuarfiusumi siulittaasussarsiornermi sassartut ilaat immikkut allaanerussuteqarpoq.
 
- Nick Nielsenip naalakkersuinermik suliaqarsimanermi sivikitsuinnaanera aammalu misilittagakinnini aporfigisinnaavai.

- Doris Jakobsenip ilisarnaatigineruaa pereersut qisuariarfigisarneri isummersornerlu tunulliuttarlugu.

- Kim Kielsen misilittagartuujuvoq ilaatigullu sakkortusinnaasunik oqariartuuteqartarnini pikkoriffigalugu, Sten Lund isumaqarpoq.

 

Siumut immikkut ittumik arfininngorpat ataatsimeersuassaaq, tassanilu siulittaasumik nutaamik toqqaasoqassalluni.

Aamma atuaruk