Nick Nielsen (S): Qinerniaqinasinga
Qinerniaqinasinga, Naalakkersuisunaasiit ajunngitsuliorpata uppisiinnaqinavakka, Nick Nielsen ilaatigut facebookimini allappoq.
Nick Nielsenip partiiminit tv-kkoornissamut periarfissinneqannginnerarpoq, qineqqusaarutinilu tusaaneqassappata arlaannik iliuuseqartariaqarluni.
- Uani oqariartuutigisakka killormut oqariartuutigisaqattaarpakka, aamma ilungersorsimaqaanga aamma Qineqqusaarnermi kingullermi. Qinersinga sulerusuppunga, suliniuteqarpunga pittaasumik. Kisiat taakku qisuariarfigineqarneq ajorpput, soorlu TV-kkoornissat killilipilussuummata. TV-kkoornissannut periarfissaqartinneqannginnama. Taava massakkut eqqarsarpunga immaqa oqariartuutit killormut saatsillugit inuiaqatigiinnut oqariartuutigigukkit aatsaat qisuariartoqassaaq, Nick Nielsen KNRimut nassuiaavoq.
Partiiminit ajattorneqartoq
Nick Nielsen ilisimaneqartutut qaammat kingulleq naalakkersuisunit tunuarpoq Siumumi Naalakkersuisunilu siulittaasuusimasoq akerleralugu tamat oqartussaanerat pingaarnerusariaqarnera tunngavilersuutigalugu. Tunuarneralu parteeqataasa akuerisimanngilaat sakkortuumillu qisuariarfigisarsimallugu, allaat Siumukkormiuunngitsutut taasarlugu.
Siumut immikkut ittumik ataatsimeersuarnermi Nick Nielsen siulittaasussatut sassaraluarpoq, qinersisinnaasunili 66-iusuni marlunnik qinerneqarluni siulittaasunngunngilaq. Siulittaasunngunngitsoornini pakatsissutigisimaneraa aperaarput.
- Naamik, nalunngereerpara siulittaasunngorsinnaananga, politikkikkut nutaajuallaarpunga taamatut sulinissannut. Taamatut sassarninni ersersinniarpara qanoq pisoqaraluarpalluunniit, ilamma ajortortigigaluarpanngaluunniit Siumukkormiuunera. Aamma oqalugiarninni ilakka nersualaarpakka naak kiinnernerat sakkortugaluartoq, Nick Nielsen oqaluttuarpoq.
Taanna ippassaq facebookimini qineqqusaarutini killormut oqariartuutigisaqattaarlugit aallartippoq. Qallunaat oqaasii salliunneqassasut, inissiarsuit aserfallassimaqisut akii qaffanneqassasut kiisalu Qaqortumi pingasunik mittarfiliortoqassasoq ilaatigut oqariartuutigai.
Taamaaliorneralu Siumut allaffeqarfianit ullaaq qisuariarfigineqarpoq.
- Ullaap tungaa partiitta allaffianiit sianerfigineqarpunga oqarfigineqarlunga qineqqusaarnerit taamatut ingerlanneqarneq ajortut.
- Annilaangasut qanoq ikkasoralunga, kisianni oqaatigisinnaavara ajoquteqanngilluinnarpunga. Aamma isumaqaraluarama qineqqusaarnerit kiffaanngissuseqarluta ingerlatissallutigit. Taanna attatissavara, namminiussuseqarpunga Nunatsinnilu pitsaanerpaamik anguniagaqarlunga sullisserusullunga.
Qineqqusaarutai uani takukkit
