Neriuffik katersuiniarnermini rekordiliivoq

Katersuiniarneq Nuummi Ilimmarfimmi ingerlanneqartoq KNR TV-kkut toqqaarnartumik aallakaatinneqarpoq.

Neriuffik siorna 2014-mi nuna tamakkerlugu katersuiniarnernmini 2.487.964,00 kr-nik katersivoq taakkua ippassaq qaangerneqarput rekordiliisoqarporlu.

- Nuna tamakkerlugu suliniaqatigiiffik Neriuffiit kattuffiat sinnerlugu katersorneqarput    2.525.246,45 kr,  Neriuffiup siulittaasua Sara J. Brandt taama oqarpoq.

Nappaat kræfte akiorniarlugu suliniaqatigiiffiup Neriuffiup  nuna tamakkerlugu kattuffiani siulittaasup Sara J. Brandtip  nuna tamakkerlugu aningaasanik katersuiniarnermi ippassaq pissarsiarineqartut amerlaneri tuppallarnartippai.

- Siorna katersuiniarnerup kingorna suliniutigisagut paasineqarlutik  tapersersorneqarnerat assut tuppallerneqarpoq, Sara J. Brandt oqarpoq.

Sara J. Brandtip siusinnerusukkut oqaluttuaraa, aningaasat katersorneqartut nunatsinni kræftemik eqqugaasut pillugit atuagaaqqakkanik saqqummersitsinissanut aamma siunnersuisarfimmik nutaamik pilersitsinissamut atorneqarumaartut.

- Aningaasat katersorneqartut kattufiup neriuffiup suliniarneranut pingaaruteqarnerat Sara Brandtip  erseqqissaatigaa.

- Assorsuaq tupallernarpoq, tassunakkut ersarissisippaa  suliniutissatsinnut tapersersuisut amerlanerat taakkualu pingaaruteqaqaat suleriarnissatsinnut, Neriuffiup siulittaasua Sara J. Brandt taama oqarpoq.

Neriuffimmi siulersuisut ullumi ataatsimiissappput ilaatigut aningaasanik katersuiniarneq ippassaq ingerlanneqartoq nalilersuiffigineqassalluni aamma nuna tamakkerlugu suliniaqatigiiffiup siunissami suliassai oqaluuserineqasallutik.

Kalaallit Nunaanni inuit 170it missaannik amerlatigisumik nappaammik kræftemik napparsimalertarput.