Neriorsuutit akisuallaarnerarpaat

- Naalakkersuisut siulittaasuata Hans Enoksenip ukiortaami oqalugiaataa neriorsuuterpassuarnik akisussaqisunik ikinngitsunik imaqarpoq, ukiumillu nutaamik aallartitsipiloorluni. Pissanganarpoq neriorsuutit eqqortinneqassanersut.

Naalakkersuisut siulittaasuata ukiortaami oqalugiaataa illuatungiliuttut Demokraatit isornartorsiorpaat. Demokraatit politikkikkut oqaaseqartartuat, Palle Christiansen, sakkortuumik qisuariarluni tusagassiuutitigut allappoq, neriorsuutit qanoq ililluni aningaasartalissanerlugit Naalakkersuisut siulittaasuata ataasiarluniluunniit oqaatiginngikkaa.

- Pinngortitaq pillugu siunnersuineq Naalakkersuisut soqutiginngilluinnaraat erseqqissilluinnarsimavoq. Aperisoqarsinnaavoq, pinngortitaq pillugu siunnersuisussanik Naalakkersuisut sooq atugassamaateqassappat, biologit innersuutaannik tusaajumanngikkunik, Palle Christiansen oqarpoq.

Nannunik, saattuanik raajanillu Naalakkersuisut juullip ukiortaallu akornanni pisassassiinerat, biologit innersuinerannut naleqqiullugu annertuallaartoq, Demokraatit politikkikkut oqaaseqartartuata tassani tikkuarpaa. Qilalugartassanik biologit juullinngitsoq innersuussuteqarnerat Naalakkersuisunit aamma soqutigineqanngilluinnarsimasoq, Palle Christiansen tikkuaavoq.