Neriorsuummik qimarratiginninneq Doris Jakobsenip akuerisinnaanngilaa
Nunanut allanut ministerip taamatut aalajangernera Siumut sinnerlugu folketingemi ilaasortap Doris Jakobsenip akuerisinnaanngilaa.
- Naalakkersuisut siulittaasuata danskit naalakkersuisuinut saaffiginninnissaa kissaatigissavara, piumasarissagaalu arlaannaannulluunniit attumassuteqanngitsunit missisuiffigineqarnissaa kalaallinit kissaatineqartoq ataqqeqqullugu.
Danskit naalakkersuisuinit neriorsuutigineqartoq eqqortinneqanngilaq tamannalu ajuusaannarpoq, Doris Jakobsen oqarpoq.
Danmarkimi naalakkersuisuutitaqartut, Radikale Vesntret, Socialdemokraatit aamma SF-it, septembarip qaammaataani piumasaraat, tigusanik timmisartuussisarsimanermik oqarneq pillugu misissuisoqarnissamik piumasaqarlutik, maannali tassa Villy Søvndal isumaqarpoq misissuisitsinissaq atorfissaqanngisoq.
- Missuisuisoqannginnissamut tunngavilersuutigineqarpoq, qanga pereersut akisoqisullu suliarineqarnissaat ernummatigineqarmat, nunanut allanut ministerinngorlaaq taamatut oqarpoq.
Doris Jakobsenip maanna nunanut allanut ministeri qinnuiginiarpaa, misissuisitsineq taamatut ittoq qanoq akeqarnersoq misissuiffigeqqullugu aammalu akisunerarlugu oqarneranut tunngavilersuutit nassuiaatigeqqullugit.
Villy Søvndalip aalajangernera Enhedslistenimit isorneqartorsiorneqarpoq, soorluttaaq inuit pisinnaatitaaffiinik suliaqatigiiffiup Amnesty Internationalip aamma Naalagaaffiit Peqatigiit Kattuffianni isumaqartoqartoq, amerikamiut isertortumik paasiniaasartuinut pasilliutigineqartut iternga tikillugu paasiniarnissaat pisariaqartoq.
Inatsisartut nunanut allanut isumannaallisaanermullu ataatsimiiitiliaani ilaasortat, Siumut, Demokraatit Atassullu piumasaraat, Naalakkersuisut siluttaasuata Kuupik Kleistip danskit naalakkersuisuinik oqaloqateqarnissaa, Vllly Søvndalip aalajangernera pillugu.
IA sinnnerlugit nunanut allanut ataatsimiititaliap siulittaasuata tullia Juliane Henningsen paasissutissat pigineqareersut atuaqqaarniarpai, taannalu isumaqarpoq, pineqartoq nukingiuttariaqanngisoq.
