Neqit trikineqarnersut misissorneqartarunnaarput
Kalaallit Nunaanni Uumasunut Nakorsaqarfik Inuussutissalerinermullu Oqartussaaffik, Peqqissutsimut Naalakkersuisoqarfik aamma Nunatsinni Nakorsaaneqarfik nalunaaruteqarput
Trikininik pinngitsaaliilluni nakkutilliisussaatitaaneq pillugu nalunaarut marsip 14-ianni 1966-imit atulersinneqartoq atorunnaartussanngorpoq.
Nalunaarut atorunnaarmat nannut aarrillu neqaat tunisassiatut tunitinnagit tunissutigitinnagilluunniit trikineqarnersut septembarip aallaqqaataanit nakkutigineqarunnaassapput.
AAMMA ATUARUK IAs sommermøde ramt af parasitter
Trikininik misissuisarnerup takutippaa, nalileruminaatsinneqarlunilu neqit misissorneqartut trikineqarnersut trikineqannginnersulluunniit. Taamaattumik trikininik misissuineq atuisunut toqqissisimassutigineqarneq ajorpoq.
Taamaattumik Kalaallit Nunaanni Uumasunut Nakorsaqarfik Inuussutissalerinermullu Oqartussaaffik, Peqqissutsimut Naalakkersuisoqarfik Nunatsinnilu Nakorsaaneqarfik inassutigineqarpoq, nannup, aarrup, puisit nersutillu allat qaasuttut neqaat tunngavimmikkut trikininik tunillannartoqartutut pineqartariaqartut.
Trikinit pinngitsoorniarlugit neqi sakkukinnerpaamik 75 celsius gradinut qalatsitassaavoq.
AAMMA ATUARUK Misissuineq nannup trikineqarneranik takutitsinngilaq
Neqi qalatsilluarneqarsimasoq trikininik tuniluussinnaasunik aarlerinartueruttarmat.
Trikinit quperlui neqi qeritinneqaraluarluni panertinneqaraluarluniluunniit toquneq ajorput, quperlut nillertumut silaannarmullu panertumut naleqqussarsimasuugamik. Taamaattumik qularnaavillugu trikininik tunillatsittoqassanngippat neqi uunneqassaaq, qalatsilluarneqarluni imaluunniit sialluarneqarneqarluni.
Inuit Ataqatigiit Narsami 2016-imi aasaanerani katersuunneranni inuit arlallit nannup neqaanni uumasuaqqanik, trikininik tunillatsissimapput.
Nannup neqaa sassaalliutigineqannginnerani trikineqanngitsutut misissuinerup takutikkaluarpaa, tamatumali kingorna nannup neqaa sinneruttoq Danmarkimut misissuiffimmut nassiunneqarpoq, nanorli trikininik uumasuaraqartoq misissuinerup takutippaa.
