IA-mi ilaasortat trikininittut

- Inuit pingasut tunillatsissimasut Kalaallit Nunaanni nakorsaaneqarfimmut nalunaarutigineqarpoq. Nakorsaatilerinermullu immikkortooqarfik naapertorlugu ataaseq aamma tunillatsissimasinnaavoq, nakorsaaneq Henrik Trykker oqarpoq.

Inuit Ataqatigiinnut ilaasortat 50-it missaanniittut Narsami aasaq junip qaammataani ataatsimiinneranni tunillatsittut pingasut saniatigut allanik tunillatsittoqarsimanersoq, nakorsaaneq suli oqarsinnaanngilaq.

AAMMA ATUARUK Isumasioqatigiinneq uran pillugu oqallinnermik aallartinneqarpoq

Nannup neqaa inuussutissanut ilinniarfimmit, Inuilimit, sassaalliutigineqarpoq. Neqi kalaalimineerniarfimmi pisiaasoq, Inuilimi ilinniarnermi aqutsisoq Nuuk TV-mut oqarpoq. 

Trikinilli neqimit tassanngarpiameernersut Dronning Ingridip napparsimmaveqarfissuata maannakkut misissoqqissaarpaa.
Aamma unioqqutitsisoqarsimanersoq Inuussutissalerinermut Oqartussaaffiup aamma misissorpaa.

Tunisisup neqi trikineqannginersoq misissortissallugu akisussaaffigigaa, Uumasunut Nakorsaqarfik Inuussutissalerinermullu pisortaq erseqqissaavoq. 

AAMMA ATUARUK Nanoq inoqarfimmut qaninniarpallaartoq

- Malittarisassat unioqqutikkaanni, tamanna mianersoqquneqarnermik, akiligassinneqarnermik arsaarneqarnermillu kinguneqariaannaavoq, Uumasunut Nakorsaqarfik Inuussutissalerinermullu Oqartussaaffimmi immikkoortortaqarfimmi pisortaq Oluva Niclasen oqarpoq.

Uumasut trikineqartartut, soorlu nannut aarrillu, neritinnagit sivisuumik uunneqartarnissaat Uumasut Nakorsaqarfianit innersuussutigineqartarpoq. 

Inuit Ataqatigiit KNR-imut oqaaseqartissinnaasimanngilagut.