Nanoq inoqarfimmut qaninniarpallaartoq

(Nutartigaq 8.7.11 nal. 13:50)

Nanoq pisarineqarmat Kangerlussuarmi takornariat innuttaasullu ussapput.

Kangerlussuarmi umiarsualiviup sissaata ungasinngisaani illuaqqap nuannaariartarfiit ilaata silataaniitilluni nannumit arnavissamit ippassaq qaninngoorneqarpoq. Arnaq oqarsimavoq 5-10 meteriinnarnik  qanitsigisimagaani. Politiinut siarnutigineqarmat Kangerlussuarmi politeeqarfimmit 12-13 kilometerinik silammukarluni takuniarneqarpoq.

- Nanoq qimaatikkaluaratsigu uteqqittuarpoq. Taamaattumik Nuummi pigaartuusumut pisoq kalerriutigaarput.  Inunnut ulorianartorsiortitsinera pillugu nanoq aallaasinnaagipput pigaartuusup oqaatigaa, Kangerlussuarmi politeeq Johannes Qvist Markussen oqaluttuarpoq.

Politiit paasiniaanerminni Kangerlussuarmi kingullermik 1990-ikkunniugunartoq nannuttoqartoq oqarfigineqarput.

- Nanoq pualalaaraluarpoq, naavili siikkatsigit aqajarua qeqquaannarnik imaqarpoq. Timaata qanoq pineqarnissaa paasineqarserlugu qerititsivissuarmut eqqukkallarparput, politiit ilisimatitsipput.

Kangerlussuarmi politiit Namminersorlutik Oqartussanut saaffiginnikkamik, paasitinneqarput, nannup neqaa igiinnarsinnaagaat, kisianni amia kukittalerlugu niaqualu Namminersorlutik Oqartussanut nassiunneqassasut.

Ileqquugaluarpoq nannup neqaata trikineqaratarsinnaanera paasiniarneqareeraangat nerineqarsinnaanera akuerineqarsimatillugu neqaata meeqqerivinnut utoqqaalluunniit angerlarsimaffiannut tunniunneqartarnera. Kangerlussuarmili meeqqeriveqanngilaq utoqqaalluunniit illoqarani. Atuarfik aamma matoqqavoq.