Nepalimi nuna sajummat inuit 157-it ajunaarput
Nepalimi nuna sajummat inuit 157-it ajunaarput amerlasuullu aqqunartiterlutik. Nepalip kippasinnerusortaani nunap immikkoortuani Jajarkotimi nuna sakkortuumik ippassaq sajuppoq, Nepalimi politiit taama paasissutissiipput
Nunap sajuffianiittut oqaluttuarput, inissiat aseruatitersimasut, Indiamilu illoqarfiit pingaarnersaani New Delhimi inissiani nunap sajunnera aamma malugineqarsinnaasimasoq.
Nunap sajunnera 6,4-nik sakkortussususeqartoq Nepalimi nunap sajunneranik uuttortaavimmit oqaatigineqarpoq.
Nepalimi sumiiffimmi atorfillit oqarput, Jajarkotimi nunap sajuffiata aallaavia qattunersamiittoq taassanilu nunaqarfiit arlaqartut 190.000-nik innuttaqartut.
Nepalimi oqartussaasut nunap sajuffiata aallaavianut suli anngussimanngillat.
Nunap sajunneranit ajunaarsimasut aliasuutigalugit Nepalimi ministeriunerup Pushpa Kamal Dahalip oqaatigaa, annaassiniartartullu piaartumik annaassiniariartussasut peqqusimallugit.
Nepalimi nunap sajunneranut uuttortaavimmit paasissutissat naapertorlugit, nuna sajuppoq Nepalimi nalunaaqutaq malillugu unnuap qeqqanut tanneq qulingiluat qaangilaaraa. Nunap sajuffia Jajarkotimiittoq Nepalip illoqarfiisa pingaarnersaannit Katmandumit 500 kilometerisut ungasitsigisumiippoq.
-Illut aseruatiterput. Inuillu illuminnit qimaasariaqarsimapput. Innuttaasut annilaangasupilussuit akornanniippunga. Aseruatitersimasut misissuiffigaagut, Santosh Rokka, nunap immikkoortuani politeeq taama oqaluttuarpoq.
